د لوګر پوهنې ریاست چارواکي وایي چې د ماشومانو لپاره د ملګرو ملتونو ملاتړې ادارې/UNICEF له لوري د دولتي ښوونځیو له زدهکوونکو او ښوونکو سره د شاوخوا ۱۹ میلیونه افغانیو په ارزښت د درسي توکو مرسته وشوه.
د لوګر د پوهنې ریاست ویاند شاهپور عرب سلاموطندار ته وویل چې په یادو درسي توکو کې ۲۹۹ کېټه د ښوونکو درسي توکي، ۲۷۳۵ کېټه د زدهکوونکو درسي توکي، ۶۲ کېټه د زدهکوونکو سپورتي وسایل او ۲۶۲ کېټه د ښوونځيو تخنیکي وسایل شامل دي.
عرب زیاته کړه چې دغه درسي توکي به په یوه اوونۍ کې د لوګر د پوهنې ریاست اړوند امریتونو ته ولېږدول شي او په نوي ۱۴۰۳ ښوونیز کال کې به د ۲۷۶ ښوونځيو پر ۵۵زره زدهکوونکو او ۳۰۰ ښوونکو ووېشل شي.
د نوموړي په وینا، د پوهنې وزارت هم د لوګر په ښوونځیو کې د کتابونو د ستونزو حل لپاره څه باندې ۳۰۰زره ټوکه کتابونه برابر کړي او د نوي کال له پيل سره به له لومړي ټولګي څخه تر ۱۲ ټولګي پورې پر زدهکوونکو ووېشل شي.
د لوګر پوهنې ریاست اړوند د دولتي ښوونځيو زدهکوونکي او ښوونکي هم خوښ دي چې د ملګرو ملتونو د ماشومانو ملاتړ صندوق/UNICEF له لوري ور سره د درسي توکو مرسته وشوه.
دوي پوهنې وزارت ته وړاندیز کوي چې د لوګر په ټولو ولسوالیو کې د ښوونځيو د ودانیو او کتابونو نشتون ستونزې ته جدي پاملرنه وکړي.