د اوزبکستان د استخباراتو او سرحداتو رییس عبدالسلام عزیزوف د ترهګرۍ پر وړاندې د مبارزې برخه کې له افغانستان سره پر همکارۍ ټينګار کړی دی.
د اوزبکستان دغه پوځي چارواکي د یاد هېواد پلازمېنې تاشکلند کې د شانګهای همکاریو سازمان غونډه کې ویلي: «افغان حکومت تر خپله وسه او توانه له نړیوالې ترهګرۍ سره مبارزه کوي. افغان استخباراتي ځواکونه د داعش پر وړاندې د مبارزې په لومړۍ کرښه کې دي او ښکاره پایلې یې ترلاسه کړې دي؛ نو موږ باید د دې مسلې پر وړاندې خپل افغان ملګري یوازې پرې نهږدو.»
د سلاموطندار پښتو فېسبوکپاڼه وڅارئ
د اوزبکستان د استخباراتو او سرحداتو رییس همداراز دې ناسته کې د شانګهای همکاریوسازمان د غړیو هېوادونو او د ګډو ګټو هېوادونو د ګډو ترهګریزو ګواښونو پر وړاندې پر ګډې مبارزې ټینګار کړی دی.
اوزبکستان د هغو هېوادونو له ډلې دی چې د سرپرست حکومت تر واکمنۍ لاندې له افغانستان سره ښې اړیکې لري او هڅه یې کړې چې دغه اړیکې پراخې کړي.