پکتیکا کې د لومړي ځل لپاره په ۶.۵ میلیونه افغانۍ د یوه معیاري مسلخ د جوړېدو چارې پیل شوې.
د پکتيکا ولايت مقام څخه نن « چهارشنبه، وږي ۲۸مه» سلاموطندار ته په رالېږل شوې خبرپاڼه کې ويل شوي چې دغه مسلخ د ښرنې ښاروالي ریاست په مالي لګښت جوړېږي.
خبرپاڼه کې د پکتیکا مرستیال والي مولوي مخدوم عبدالسلام سعادت له قوله راغلي چې مسلخ خلکو ته له ناروغیو د پاکې غوښې وړاندېکولو او د ښار پاک ساتلو او ناروغیو مخنیوي برخه کې اړین دی.
د مرستيال والي په خبره، د یاد مسلخ پر جوړېدو شپږ نیم میلیونه افغانۍ لګښت راځي چې د ښاروالي ریاست له بودیجې څخه ورکول کېږي او چارې به یې د یوه کال په موده کې بشپړې شي.
خبرپاڼه کې دا هم ويل شوي چې ياد مسلخ د ښرنې ښار يوه څنډه کې په ۲۰۰۰ متره مربع ځمکه کې جوړېږي چې په بشپړېدو سره به يې ټول مالونه په ياد مسلخ کې حلال او غوښه به یې، بازار ته د پلور لپاره وړاندې کېږي.