د اسراییل او حماس ترمنځ له نږدې اوو اوونیو جګړې وروسته د شوي څلور ورځني اوربند په لړ کې دواړو لوریو یوشمېر بندیان خوشې کړې دي.
حماس ډلې د اوربند په لومړۍ ورځ ۲۴ یرغمل شوي کسان خوشې کړي او اسراییلو بیا د دغه هېواد له بندخونو ۳۹ فلسطیني وګړي ازاد کړې دي.
د قطر د بهرنیو چارو وزارت ویاند مجید الانصاري «جمعه نومبر ۲۴مه» ویلي چې د حماس لهخوا په خوشې شویو کسانو کې ۱۳ اسراییلیان، لس ټایلنډي وکړي او یو فلیپینی شامل دي.
الجزیرې خبري شبکې «جمعه نومبر ۲۴مه» یوه راپور کې د سره نړیوالې کمېټې له قوله ویلي چې دغه ۲۴ بندیان په خوندي توګه ازاد شوي دي. ایسيارسي پر اېکس لیکلي: «د ۲۴ بندیانو د خوندي ازادېدو له تایید خوشحاله یوو.»
د اسراییلو پوڅ هم منلې چې ازاد شوي بندیان وررسېدلي او خپلو کورنیو سره تر یوځای کېدو مخکې به یې د روغتیايي وضعیت ډاد لپاره معاینات ترسره شي.
په ورته مهال قطر چې د دې اوربند منځګړیتوب کوي، ویلي، د ښځو او ماشومانو په ګډون د اسراییلو له زندانونو ۳۹ فلسطیني وګړي خوشې شوې دي.
د قطر په منځګړیتوب د شوي اوربند پر مهال به حماس ډله به د ښځو او ماشومانو په ګډون ۵۰ یرغمل شوي کسان خوشې کوي او په ځواب کې به یې اسراییل د دغه هېواد له بندخونو د ښځو او ماشومانو په ګډون ۱۵۰ کسان ازاد کړي.
سلاموطندار پر ټویټر هم وڅارئ
حماس د اکتوبر پر اوومه پر اسراییلو د ناڅاپي برید پر مهال څه باندې ۱۲۰۰ کسان ووژل او نږدې ۲۵۰ کسان یې له ځان سره بوتلل چې غبرګون کې یې اسراییلو پر غزې پراخ بریدونه پیل کړې دي.