د یمن کې د حوثیانو ډله وايي چې د اسراییلو پر مرکزي سیمو یې، توغندیز بریدونه کړي دي.
د حوثیانو پوځي ویاند یحیی سرېع په یوې بیانیه کې چې د یادې ډلې پورې د تړلي، المسیره ټلوېزیون له لوري خپره شوې، ویلي چې دوی دغه برید د ایران د پوځ سره په همغږۍ شوی دی.
د اسراییلو پوځ وايي چې د غزې په سوېل کې د نښتو پرمهال یې، یو سرتېری وژل شوی دی. دا پر غزې د اسراییلو د برید راهیسې په یاده سیمه کې لومړی سرتېری دی چې وژل کېږي.
د بنښې نړیوال سازمان وايي چې د نایجریا په مرکزي «بینو ایالت» کې د وسلهوالو له لوري د مرګوني برید پرمهال ۱۰۰ کسان وژل شوي دي.
د یاد سازمان په وینا، برید تېره جمعه، د یاد ایالت اړوند په «ېلېواتا کلي» کې شوی دی.
یاد بنسټ پر خپله اېکسپاڼه لیکلي: «ډېری خلک لاهم ورک دي … لسګونه ټپیان شوي او له درملنې پرته پاتې دي. ډېرې کورنۍ په خپلو خوب خونو کې بندې شوي او سوځول شوې دي.»
په اسراییلو کې د امریکا سفیر د ایران د بریدونو له کبله اړ شوی چې د شپې پنځه ځلې د ځان ساتنې لپاره خوندي ځای ته پناه یوسي.
مایک هکابي پر خپله اېکسپاڼه لیکلي چې پر اسراییلو د توغندیزو بریدونو له کبله یې، سخته شپه تېره کړې او په وینا یې، پنځه ځلې یې، ځای بدل کړی دی.
د اسراییلو د دفاع وزیر اسراییل کاتز ایران ته خبرداری ورکړی چې پر تلابیب د توغندیزو بریدونو له امله به «سخته بیه» پرې کړي.
نوموړي خبرداری ورکړی، که ایران خپلو توغندیزو بریدونو ته دوام ورکړي، د ده په ټکو «تهران به وسوځېږي.»
اسراییل کاتز د پوځ له لوی درستیز سره ته د ارزونې له یوې ناستې وروسته وویل چې ایران به اسراییلو ته د زیان رسولو درنه بیه پرې کړي.
د اسراییلو پوځ وايي چې نن سهار ځايي وخت شاوخوا لس بجې له غزې څخه د دوی پر لور دوه توغندي ویشتل شوي دي.
د اسراییلو پوځ په یوې خبرپاڼه کې ویلي چې دغه توغندي په یوې خلاصه سیمه کې لګېدلي او چاته پهکې زیان نهدی اوښتی.
د ایران او اسراییلو ترمنځ د روانې ترینګلتیا په لړ کې یوه ایراني چارواکي ویلي چې تهران به سیمه کې له اسراییلو دفاع کوونکي هېوادونه په نښه کړي.
دغه ایرانی لوړپوړی چارواکی چې نوم یې، نهدی په ډاګه شوی نړیوالو رسنیو ته ویلي، ایران به سیمه کې د هغو هېوادونو اډې په نښه کړي چې په وینا یې، هڅه کوي، له اسراییلو دفاع وکړي.
د حماس یوه چارواکي پر اسراییلو د ایران توغندیز بریدونه ستایلي او ویلي یې دي چې د اسراییلو دفاعي سېسټم د یادو توغندیو په شنډولو کې پاتې راغلی دی.
د حماس لوړپوړي چارواکي عزت الرشیق په یوه بیان کې زیاته کړې چې د اسراییلو دفاعي سېسټم او اوسپنیز ګنبد چې ډېر پرمختللی بلل کېده، د ایران د توغندیو شنډولو کې ناکام شوی دی.
د ایران دولتي رسنیو راپور ورکړی چې د دغه هېواد په شماللوېدیځ کې د اسراییلو ډرون وېشتل شوي او لهمنځه وړل شوي دي.
په راپور کې ویل شوي چې دغه ډرون د جاسوسۍ لپاره د ایران فضا ته ننوتلې وې چې د ایران د پوځ له لوري وېشتل شوي دي.
د ایران پوځ وايي چې پر اسراییلو د توغندیزو بریدونو وروسته تازه د ډرون بریدونو په نویو څپو کې یې، د اسراییلو مرکزي سیمې په نښه کړي دي.
د اسراییلو پوځ هم تایید کړې چې د ایران د ډرون بریدونو سره ګڼو ښارونو کې د خطر زنګونه وهل شوي دي.
د ایران دولتي رسنیو راپور ورکړی چې نن سهار «شنبه، غبرګولي ۲۴مه» د تهران مهراباد هوايي ډګر د اسراییلو له لوري بمبار شوی دی.
د ایرنا خبري اژانس د راپور له مخې، دغه برید داسې مهال کېږي چې اسراییلو بېګاه شپه هم د یاد هوايي ډګر ته څېرمه بریدونه کړي وو.
پر ایران د اسراییلو له برید وروسته د امریکا ولسمشر ډونالډ ټرمپ خپل دریځ بدل کړی او دغه برید یې، ستایلی دی.
نوموړي له دې وړاندې د اسراییلو لومړي وزیر بیامین نتنیاهو ته خبرداری ورکړی و چې پر ایران له برید لاس واخلي.
ډونالډ ټرمپ په خپله ټولنیزه رسنۍ «ټروټ میډیا» پر ایران د اسراییلو برید «عالي» بللی او ایران یې، د دغه برید له امله تورن کړی دی.
د امریکا ولسمشر ډونالډ ټرمپ د ایران په اټومي تاسیساتو او پوځي چارواکو د اسراييل بریدونو ته لومړني غبرګون کې ویلي، “هوکړې ته د رسېدو لپاره یې ایران ته ډېر فرصتونه ورکړي وو”، خو اوس شرایط توپیر کوي.
هغه ویلي، «ځینې ایراني توندلارو د زړورتیا خبرې کولې، خو نه پوهېدل چې څه به پېښ شي. اوس هغوي ټول مړه شوي او اوضاع به نوره هم بدتره شي.»
د سوریې په سوېللوېدیځ کې له حماس سره د غړیتوب په تړاو د اسراییلي ځواکونو د عملیاتو پرمهال یوشمېر کسان نیول شوي دي.
اسراییلي ځواکونه وايي چې دغه کسان د فلسطین جهادي ډلې «حماس» غړي دي، خو د سوریې کورنیو چارو وزارت ټينګار کوي چې نیول شوي، ملکیان دي.
د ملګروملتونو د کډوالو اداره وايي چې دا مهال په ټوله نړۍ کې د جګړو او ځورونو له کبله څه باندې ۱۲۲ میلیونه وګړي له خپلو سیمو بېځایه شوي دي.
د ملګروملتونو د کډوالو عالي کمېشنر فلیپو ګراندي د ۲۰۲۵کال د اپرېل تر پایه تېرکال ته په پرتله څه باندې دوه میلیونه وګړي نور هم بېځایه شوي دي.
وروسته له هغې چې اسراییل پر ایران او مقابل کې یې ایران سیمه کې د امریکا د اډو په نښهکولو ګواښ وکړ، یمن کې حوثیانو پر ایران د متحده ایالتونو او اسراییل برید په صورت کې د ‘جګړې’ خبرداری ورکړی.
نیوزویک مجلې تېره ورځ د حوثي ډلې یوې سرچینې په خبره ویلي، که اسراییل او امریکا پر ایران برید وکړي، نو جګړه به ټولې سیمې ته وغځيږي.
