د ټولګټو چارو وزارت په مالي ملاتړ د ۷۹۰ میلیون افغانیو په لګښت د ارزګان ـ کندهار د لویې لارې اساسي رغېدو چارې په رسمي ډول پیل شوې.
د ارزګان او کندهار ولایتونو مسوولان دغه پروژه د اسلامي امارت له مهمو پراختیايي پروژو بولي او ډاډ ورکوي چې په راتلونکې کې به د ورته نورو لویو پروژو د پلي کېدو هڅې هم وشي.
د ارزګان والي مولوي عنایت الله شجاع د پروژې د عملي کېدو پر اهمیت ټینګار وکړ او ویې ویل: «دا ډېر د خوشحالۍ ځای دی چې موږ د داسې پروژې شاهدان یو. له مسوول شرکت غواړو چې د دغې پروژې چارې دې په ښه ډول ترسره کړي.»
د کندهار والي مرستیال مولوي انقلابي بیا د جګړې له پای او د پروژو له پیل څخه یادونه وکړه او ویې ویل: «الحمدالله پخوا به جګړې وې، اوس اسلامي امارت دومره کوي چې پروژې عملي کوي. خلک باید د دغه حالت شکر ادا کړي.»
د کندهار ـ ارزګان د لویېلارې رغولو پروژې مسؤل انجینر جمیل مشال د پرانېستې په مراسمو کې وویل: «دا ۲۴ کیلومتره سړک دی، د شاولي کوټ څخه تر ترینکوټ پورې. د رغېدو لپاره یې ۷۹۰ میلیونه افغانۍ ځانګړې شوي او د دوه کلونو په موده کې به یې د رغېدو چارې بشپړې شي.»
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د کندهار او ارزګان ولسي خلک او مسافر هم خوښ دي چې دغه لویهلاره رغول کیږي.
د ارزګان اوسېدونکي حیات الله ذاهد او محمدخان وايي: «موږ بیخي ډېر خوشحاله یو چې د یوې داسې پروژې کارونه پیل شول. ځکه دغه زموږ د ټول ولایت یوه مهمه او اساسي لاره ده. الله ج دې حکومت ته خیر ورکړي چې داسې پروژې یې پیل کړي.»
«موږ د مسؤل شرکت څخه غواړو چې په دغه پروژه کې په اساسي ډول کار وکړي، ځکه څو ځله مخکې هم دغه لاره جوړه شوې وه، خو بېرته به خرابه شوه.»
د ارزګان ـ کندهار ترمنځ لار د ارزګان یوازینۍ د تګ راتګ لار ده او ټولې ورځنۍ اړتیاوې پرې پوره کېږي.
د ولسي خلکو په باور، د دې لارې اساسي رغېدل به د ژوند په اقتصادي او ټولنیز پرمختګ کې مهم رول ولوبوي.
د ارزګان ـ کندهار د لویېلارې د رغېدو پروژه نه یوازې د سیمې د خلکو د اوږدمهالو غوښتنو ځواب دی، بلکې د اقتصادي او ټولنیز پرمختګ لپاره یو حیاتي ګام هم بلل کېږي.
خو عام خلک ټینګار کوي چې د پروژې د کیفیت له نږدې څارنې پرته به دا هڅه اوږدمهاله ګټه ونه لري.