غزه کې د اسراییلو د بریدونو له امله یوازې پر یوه ورځ ۶۱ کسانو خپل ژوند له لاسه ورکړی او یوشمېر نور ټپیان شوي دي.
په مړو شویو کې یوه لس کسیزه کورنۍ هم شامله ده چې د اسراییلو په یوه برید کې د همدې کورنۍ لس غړي یوځای وژل شوي دي.
د سلاموطندار پښتو فېسبوکپاڼه وڅارئ
د فلسطین وفا خبري اژانس نن چهارشنبه، اکتوبر ۱۵مه راپور ورکړی چې د نن ورځې په بریدونو کې پنځه کسان وژل شوي دي.
د یاد خبري اژانس په وینا، برید د غزې په سوېل، نصیر سیمه کې پر یوه کور شوی دی. دې برید کې ۷ نور کسان ټپیان شوي او د روغتیايي وضعیت په اړه یې، څه نهدي ویل شوي.
له دې سربېره اسراییلو د غزې شمال له نږدې دوو اوونیو راهیسې کلابند کړی او په سېسټماټیک ډول د ویجاړۍ لړۍ یې، پیل کړې.
پر غزې د اسراییلو د برید راهیسې تر دې مهاله ۴۲۳۴۴ کسانو خپل ژوند له لاسه ورکړی او ۹۹۰۱۳ کسان هم ټپیان شوي دي.
غزه کې د کلابندۍ او د اسراییلو د بریدونو او عملیاتو له امله میلیونونه کسان له قهطۍ سره مخ دي او همدومره نور بیا له خپلو سیمو بېځایه شوي.