د ایران او امریکا ترمنځ د اټومي مذاکراتو دویم پړاو پایته ورسېد او دواړو لورو له څو ساعته خبرو وروسته د ناستې ځای پرېایښی دی.
د ایران دولتي خبري اژانس یوه راپور کې ویلي، دغو مذاکراتو ۳ نیم ساعته دوام وکړ او دواړه لوري د عمومي موضوعاتو په اړه یو بل سره تفاهم ته رسېدلي.
د ایران بهرنیو چارو وزیر عباس عراقچي د دې پړاو تر پایته رسېدو وروسته د ایران له دولتي ټلویزیون سره لنډو څرګندونو کې مذاکرات رغنده وبلل.
نوموړي زیاته کړه: «بېلابېلې نظریې مطرح شوې او پر دغو نظریو جدي بحث وشو. په پایله کې موږ وکولی شول د یو لړ لارښودو اصولو پر سر عمومي موافقې ته ورسېږو چې له دې وروسته به د همدغو اصولو پر بنسټ مخته ځو او د احتمالي هوکړې متن ته به داخلېږو.»
عباس عراقچي همداراز د تېرې ناستې په پرتله د ښه پرمختګ یادونه وکړه او ویې ویل: «اوس موږ یو روښانه مسیر په مخکې لرو چې زما په اند مثبت دی.»
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د ایران بهرنیو چارو وزیر له څرګندونو څو ساعته وروسته، د عمان بهرنیو چارو وزارت هم په یوه اعلامیه کې وویل، د ایران او امریکا ترمنځ د نننیو خبرو په ترڅ کې «یو محسوس پرمختګ» شوی.
امریکايي چارواکو تراوسه د دغو مذاکراتو په اړه څه نه دي ویلي.
ټاکل شوې چې دواړه لوري خپلو حکومتونو سره تر مشورو وروسته د موضوعاتو پر جزییاتو خبرو ته دوام ورکړي.
په دې پړاو مذاکراتو کې د ایراني مذاکره کوونکي پلاوي مشري د دغه هېواد د بهرنیو چارو وزیر عباس عراقچي او د امریکايي لوري هم استیو ویتکاف په غاړه درلوده.
د ایران او امریکا ترمنځ دویم پړاو اټومي مذاکرات په غیرمستقیم ډول او د عمان په منځګړیتوب جینوا کې ترسره شو.