د افغانستان کرېکټ ملي لوبډله به نن شنبه، لیندۍ ۲۴مه د درېوو شل اووره سیالیو د لوبلړۍ ګټلو لپاره له زمبابوې کرېکټ ملي لوبډلې سیالي وکړي.
یاده سیالي به نن مازدیګر څلور بجې د زمبابوې په حرېرې کرېکټ لوبغالي کې ترسره شي.
د سلاموطندار پښتو فېسبوکپاڼه وڅارئ
افغانستان او زمبابوې له دې وړاندې د روانې لوبلړۍ له شویو دوو سیالیو څخه یوه یوه لوبه ګټلې او د کېدونکې لوبې ګټونکې لوبډله به د لوبلړۍ اتلولي هم خپله کړي.
زمبابوې لومړۍ او افغانستان بیا دویمه سیالي ګټلې. افغان لوبډلې په دویمه لوبه کې زمبابوې ته په ۵۰ منډو ماته ورکړه. د دواړو لوبډلو ترمنځ د وروستیو پنځو شل اووره سیالیو کې څلور ځلې افغانستان او یوازې یو ځل زمبابوې بریا خپله کړې.
افغانستان له شل اووره سیالیو وروسته، له زمبابوې سره د یو ورځنیو او ټسټ لوبو لوبلړۍ هم لري چې په دغه هېواد کې به ترسره شي.