بلخ کې د کرنې ریاست مسوولان وايي چې دغه ولایت کې د ښځو کورني تولیداتو او کرنیز یو ورځنی نندارتون جوړ شوی دی.
دغه نندارتون نن پنجشنبه، تلې ۱۹مه د بلخ مرکز مزارشریف ښار کې جوړ شوی او مالي لګښت یې، د ماشومانو لپاره د ملګروملتونو ملاتړې ادارې یا یونېسف له لوري ورکول کېږي.
د سلاموطندار پښتو فېسبوکپاڼه وڅارئ
په دې نندارتون کې د مېرمنو کورني تولیدات، لاسي صنایع او کرنیز محصولات نندارې ته وړاندې شوې دي.
د بلخ د کرنې ریاست د پلان مدیر عبدالعزیز میوند وايي چې یاد نندارتون د کورنیو ملاتړ او د مېرمنو د ځانبسیاینې په موخه جوړ شوی دی.
د میوند په وینا، دې نندارتون کې د بلخ او سمنګان د دهداداي او خُلم ولسوالیو متشبثو مېرمنو کورني تولیدات په ۷۰ غرفو کې نندارې ته کېښودل شوي دي.
هغه وویل: «د کرنیزو تشبثاتو د پراختیا پروژه د کورنیو اقتصادي ودې لپاره ده او د درېیم نندارتون دی. د دې پروګرام موخه د کروندګرو او تولیدونکو ترمنځ د پلور اړیکې رامنځته کول دي.»
بلخوا یوشمېر متشبثې مېرمنې د دغه نندارتون پر جوړېدو خوښي څرګندوني او وايي چې ورته نندارتونونه کولای شي، د مېرمنو ځانبسیاینې او تولیداتو ته یې، د بازار برابرولو کې اغېزمن ثابتېدای شي.
یوې متشبثې مېرمنې فریبا نوري سلاموطندار ته وویل: «دغه نندارتون ډېرې ګټې لري، ځکه کولای شو چې د خپلو ماشومانو اړتیاوې برابرې کړو او نورې اړتیاوې هم پوره کړو.»
د مسوولانو د معلوماتو له مخې، دغه نندارتون د مېرمنو کورني تولیدات او کرنیزو محصولاتو درېیم نندارتون دی چې د یونېسف له لوري په شمال کې جوړېږي.