په پکتیا او هرات ولایتونو کې د ابتدائیه محکمو د پرېکړو له مخې پر یوشمېر کسانو د بېلابېلو جرمونو په تور تعزیري سزاوې تطبیق شوې دي.
د پکتیا د احمدخېلو ولسوالي ابتداییه محکمې د پرېکړې پربنسټ، یو کس د جعلي پیسو د کارولو په جرم پر شپږو میاشتو تنفیذي بند او ۳۰ دُرو تعزیري سزا محکوم شوی دی.
یاد حکم له هغې وروسته عملي شوی چې د سترې محکمې عالي مقام له لوري تایید شوی دی. د سزا د تطبیق پرمهال د ابتداییه محکمې مسوولانو، د ولسوالي امارتي ادارو استازو او عامو خلکو حضور درلود.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
همدارنګه، د هرات ښار ابتداییه محکمې د پرېکړې له مخې، اته کسان د الکولي مشروباتو د تولید، پېر او پلور په جرم هر یو پر دوو کلونو تنفیذي بند او ۳۹ ـ ۳۹ دُرو تعزیري سزا محکوم شوي دي.
دا پرېکړه هم د سترې محکمې له تایید وروسته د محکمې د مسوولانو او مراجعینو په حضور کې عملي شوه.
چارواکي وايي، دا ډول اقدامات د ټولنیز نظم د ټینګښت او د قانون د تطبیق په موخه ترسره کېږي.