د پاکستان په پنجاب کې پولیس وايي چې په فیصلاباد ښار کې د کمپیوټر بټرۍ د چاودنې له امله د یوې کورنۍ دوه غړي وژل شوي او اووه نور ټپیان دي.
د پاکستان جیونیوز رسنۍ د ژغورونکې ډلې له قوله ویلي چې د بټرۍ چاودېدو وروسته اورلګېدنه رامنځته شوې چې پرمهال یې د یادې کورنۍ دوه غړي وژل شوي او اووه نور ټپیان شوې دي.
د سلاموطندار پښتو فېسبوکپاڼه وڅارئ
ژغورونکې ډلې ویلي چې پېښه کې ورور او خور خپل ژوند له لاسه ورکړی او نور اووه کسان ۵۰ تر ۶۰سلنه سوځېدلې دي.
په ټپیانو کې پنځه ماشومان او دوه مېرمنې شاملې دي.
دغه پېښه داسې مهال رامنځته کېږي چې له دې یوه اوونۍ وړاندې په یوه روغتون کې د اورلګېدنې له امله ۱۱ نویو زېږدلو ماشومانو خپل ژوند له لاسه ورکړ.
د پنجاب اعلا وزيرې مريم نواز تر دې پېښې وروسته د ماشومانو په مړينه خواشيني څرګنده کړې او د غمځپلو کورنيو سره يې د خواخوږۍ او همدردۍ مراتب څرګند کړي دي.
نوموړې په پېښه کې ټپیانو ته د غوره درملنې او اسانتیاوو برابرولو امر کړی دی.