پاکستاني چارواکو ویلي چې د کراچۍ په یوه سوداګریز مرکز کې د اورلګېدنې له امله د وژل شویو شمېر لږترلږه ۶۰ کسانو ته لوړ شوی دی.
د چارواکو په وینا، د ګل پلازا شاپنګ سنټر د لټون او ژغورنې عملیات د پنجشنبې پر ورځ هم روان وو او ډلې هڅه کوي له هغو تر ۸۰ ډېر کسانو برخلیک معلوم کړي چې د شنبې ورځې د اورلګېدنې وروسته لاهم نادرکه دي.
یاد سوداګریز مرکز په ګڼمېشته تجارتي سیمه کې موقعیت لري.
د کراچۍ سوېلي سیمې د پولیسو مرستیال مشر (ډيآیجي) سیداسدرضا «ډان» ورځپاڼې ته ویلي چې لږترلږه ۳۰ جسدونه په یوې هټۍ کې موندل شوي دي.
هغه زیاته کړه چې د وروستیو موندنو پربنسټ، د مړو شویو اټکلي شمېر ۶۱ ته رسېږي، خو وروستۍ شمېره به د ډياېناې ازموینو له بشپړېدو وروسته تایید شي.
د کراچۍ سوېلي ولسوالي مرستیال کمېشنر جاوېد نبي کهوسو هم پاکستاني رسنیو ته ویلي چې دغه جسدونه د «دوبۍ کراکري» په نوم له یوې هټۍ څخه موندل شوي دي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د هغه په وینا، قربانیانو د ځان د ژغورنې په هڅه کې هټۍ له دننه قلف کړې وه.
ځايي رسنیو راپور ورکړی چې یاد کسان وروسته له هغه هټۍ ته ننوتلي وو چې د اورلګېدنې په لومړیو شېبو کې په مال کې ګډوډي او منډه ترړه رامنځته شوې وه.
د سند اعلی وزیر مراد علي شاه د مړو شویو شمېر پر زیاتېدو خواشیني وښوده او امر یې کړی چې د ودانۍ د پاتې شونو لرې کول دې تر هغه ودرول شي چې ټول جسدونه نهوي ترلاسه شوي.
چارواکو ویلي چې د پېژندنې لپاره د موندل شویو پاتې شونو نمونې راټولېږي او خبرداری یې ورکړی چې د مړو شمېر ښايي نور هم لوړ شي.