د افغاني سرې میاشتې ټولنې د شمالختیځ ساحوي زون عملیاتي امر، عبدالله هجران وايي چې په کندوز کې د شمالختیځ زون لپاره ځانګړی رواني روغتیايي مرکز په رسمي توګه پرانستل شوی دی.
د هجران په خبره، دا مرکز د هغو کسانو لپاره جوړ شوی چې له رواني ستونزو سره مخ دي او موخه یې د معیار لرونکو او تخصصي روغتیایي خدماتو وړاندې کول دي.
د شمالختیځ زون د افغاني سرې میاشتې ټولنې د رواني روغتیا مرکز مسوول ډاکټر محمدنواب مهربان وايي چې د مرکز له پرانیستې وروسته د شمالختیځ ولایتونو ناروغان کولای شي، له تشخیص، مشورې او درملنې خدماتو ګټه واخلي.
هغه زیاته کړه چې مرکز دوه درملنیزې څانګې OPDاو IPD لري چې هره څانګه د ۲۰۰ بستر ظرفیت او په ټولیز ډول ۴۰۰ بستره د رواني ناروغانو لپاره په شمالختیځ زون کې برابر شوي دي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
مهربان څرګنده کړه چې تراوسه د IPD څانګې په ۱۴ ناروغانو او د OPD له لارې له ۱۴۰۲کال د منځنۍ نیټې راهیسې شاوخوا ۹۲۹ ناروغانو ته د درملنې خدمتونه وړاندې شوي دي..
نوموړي همداراز یادونه وکړه چې دا مرکز په ۱۴۰۱کال کې جوړ شوی او د ۱۴۰۲کال له منځنۍ نیټې راهیسې یې د OPD خدمتونه پیل کړي وو او اوس د IPD څانګه هم فعاله شوې، څو هغه ناروغان چې د کندوز ښار د امربالمعروف ریاست له لوري راټول شوي، دلته درملنه شي.
مسوولان ټینګار کوي چې د داسې تخصصي مرکز پرانسته د رواني روغتیا د ښهکولو او د ټولنې په کچه د رواني ناروغیو له امله رامنځتهکېدونکو ټولنیزو ستونزو د کمولو په برخه کې مهم ګام بلل کېږي.