د ترکیې ملي راډیو ټلوېزیون مشر وايي چې د دغه هېواد تولید شوي سریالونه پر ۵۰ بېلابېلو ژبو دوبله شوي او د نړۍ په ۱۱۰ هېوادونو کې د ټلوېزیونونو او نورو خپرېدونکو شبکو له لوري خپرېږي.
د ترکیې ملي راډیو ټلوېزیون مشر محمدزاهد سوباجي دغه څرګندونې ترکیه کې د اسیا ارام-سمندر د خپرونې اتحادیې د ۶۰مې کلیزې په نمانځغونډه کې کړې دي.
د سلاموطندار پښتو فېسبوکپاڼه وڅارئ
سوباجي په دغه غونډه کې همداراز ادعا کړې چې د ترکي سریالونه او ډرامې، شاوخوا یو میلیارډ لیدونکي لري.
نوموړي وویل: «زموږ هېواد کې تولید شوي تلویزیوني ډرامې په ټوله نړۍ کې نږدې یو میلیارد خلکو ته رسیږي. موږ د تلویزیون سریالونو صنعت کې هم مخکښ یوو.»
هغه زیاته کړه: «د ټيارټي له لوري تولید شوي سریالونه په ۱۱۰ هېوادونو کې د څه باندې ۵۰ ژبو سره ژباړل کېږي او خپرېږي.»
د نړۍ په ګڼو هېوادونو کې دا مهال پر ټلوېزیونونو د ترکیې مشهور سریال «عثمان» خپرېږي چې د عثماني خلافت پر دورې راڅرخي.
دغه سریال افغانستان کې هم ګڼ مینهوال لري.