د فاریاب امنیتي مسوولان وايي چې د دغه ولایت او بادغیس ترمنځ د لویې لارې په اوږدو کې د وسلهوالو غلو د برید له امله پنځه کسان وژل شوي او پنځه نور ټپیان دي.
د فاریاب د امنیې قومنداني ویاند عبدالله مرادي رسنیو ته ویلي، پېښه پنجشنبه، تلې ۲۶مه هغه مهال رامنځته شوې چې یادو وسلهوالو غلو پر یوه پلانکوچ موټر برید وکړ.
د سلاموطندار پښتو فېسبوکپاڼه وڅارئ
د هغه په وینا، وسلهوالو غلو د فاریاب پر لاره “اق کوتل” سیمه کې د دغه موټر مخه نیولې او وروسته موټر کې د اسلامي امارت ناستو دوو سرتېرو سره په نښته شوي دي.
دغه نښته کې د دغو دوو کسانو او یوې ښځې په ګډون ۵ کسان وژل شوي او پنځه نور ټپیان دي.
عبدالله مرادي زیاتوي چې د پېښې ټپیان د فاریاب ولایتي روغتون ته د درملنې لپاره لېږدول شوي دي. د ټپیانو روغتیايي وضعیت په اړه څه نهدي ویل شوي.
د مرادي په وینا، دا یوه جنايي پېښه ده او په دې تړاو څېړنې دوام لري. ویل کېږي د یادې پېښې ټول وژل شوي کسان د بادغیس اوسېدونکي دي.