د هند په کوربهتوب د روان ۲۰۲۳ کال د یو ورځنیو سیالیو نړیوال جام کې نن د نیوزیلنډ کرېکټ ملي لوبډله له بنګلدېش سره لوبه کوي.
ټاکل شوې چې دغه لوبه نن جمعه د اکتوبر ۱۳مه د هند په «اماې چېډمباران کرېکټ لوبغالي» کې ترسره شي.
د نیوزیلنډ کرېکټ ملي لوبډلې په روان نړیوال جام کې تر دې مهاله دوه لوبې کړي چې دواړه یې ګټلې دي. دغه لوبډله د روانو سیالیو د جدول په دویم ځای کې شتون لري.
بنګلدېش چې په خپله لومړۍ لوبه کې افغانستان ته ماته ورکړه، په خپله دویمه سیالي کې د انګلستان پر وړاندې له ماتې سره مخ شوه.
بنګلدېش په یوې بریا او یوې ماتې سره د جدول شپږم ځای خپل کړی دی.
د یو ورځنیو سیالیو په وروستیو پنځو لوبو کې چې د نیوزیلنډ او بنګلدېش ترمنځ شوي، څلور یې نیوزیلنډ ګټلي او یوه لوبه د باران له امله لغوه اعلان شوې ده.
د نیوزیلنډ کرېکټ ملي لوبډلې په خپلو کړیو وروستیو پنځو یو ورځنیو سیالیو کې بیا څلور ګټلې دي. یوه لوبه یې د باران له کبله بېپایلې شوې.
بنګلدېش بیا خپلو وروستیو پنځو یو ورځنیو لوبو کې یوازې یوه سیالي ګټلې، درې یې بایللي او یوه یې د باران له امله بېپایلې اعلان شوې ده.
سلاموطندار پر ټویټر هم وڅارئ
د یادو سیالیو په لړ کې بېګاه سوېلي افریقا د اسټرالیا کرېکټ ملي لوبډلې ته په ۱۳۴ منډو ماته ورکړه. سوېلي افریقا دا مهال په دوو بریاوو سره د جدول په سرکې ځای لري. افغانستان بیا په دوو ماتو سره د جدول وروستی ځای خپل کړی دی.