غزنی حاکمی سوزلاوچیسی وحیدالله جمعه‌زاده نینگ ایتیشیچه، بوگون (چهارشنبه، ۱۹-قوس) ایرته‌لب غزنی ولایتی نینگ اندر تومن یقیین‌لیگیده‌گی امنیتی کوچلرنینگ بیر قرارگاهی بمب جایلشتیریلگن بیر موتر نینگ هجومی گه دوچ کیلدی کیم نتیجه‌ده، امنیتی کوچلردن ۳ ته‌سی هلاک و باشقه ۲ ته‌سی یره‌لنگن.
جناب جمعه‌زاده گه کوره، اوشبو موتر هدفی گه ییتیشمه‌سدن آلدین امینتی کوچلر تامانیدن تانیلیب هجوم آستیده آلینگن.
اونینگ کوپه‌یتیریشچه، امنیتی کوچلر حادثه محلیدن پارتلاوچی ماده جایلشتیریلگن مازدا تیپلی باشقه بیر موتر نینگ کشف قیلگن.
غزنی پولیس سوزلاوچیسی احمدخان سیرت بو واقعه نی تصدیقلب ایتیشیچه، امنیتی کوچلر و طالبان گروهی آره‌سیده‌گی آتیشمه ۸ ساعت دوام تاپگن.
عین حالده، مدافعه وزیرلیگی نینگ اعلام قیلیشیچه، اوتگن کیچه طالبان گروهی غزنی ولایت نینگ اندر تومنیده‌گی حربی کوچلرنینگ بیر پوسته‌سی اوستیگه هجوم اویوشتیرگن.
مدافعه وزیرلیگی نینگ خبرنامه‌سی اساسیده، بیرینچی‌ده خودکش هجومچی بمب جایلشتیریلگن موترنینگ مذکور قرارگاه ده پارتلماقچی ایکن، لیکن هدفی گه ییتیشمه‌سدن آلدین امنیتی کوچلر تامانیدن تانیلیب هلاک ایتیلگن.
خبرنامه‌گه کوره، پارتلش دن کیین طالبان گروهی آتیشمه گه باشله‌گن و نتیجه‌ده امنیتی کوچلردن ۲ ته‌سی هلاک و باشقه ۳ ته‌سی یره‌لنگن.
خبرنامه‌نینگ کوپه‌یتیریشیچه، بو هجوم امنیتی کوچلر تامانیدن دفع بولگن و طالبان گروهی گه آغیر تلفات ییتیشگن.
طالبان گروهی حاضرگچه بوحقده هیچ بیر فکر بیلدیرمه‌گن.
