دنیا بانکی نینگ اعلام قیلیشیچه، افغانستان ده باله‌لر اینیقسه قیزلر دستلبکی و متوسطه تعلیمات گه قول تاپیشی اوچون ۲۵ میلیون دالر یاردم بیره‌دی.
بوگون (پنجشنبه ۱۲- حمل) دنیا بانکی تامانیدن رسانه‌لرگه یوباریلگن بیر خبرنامه ده کیلیشیچه، مذکور بانک افغانستان باله‌لری اینیقسه قیزلر دستلبکی و متوسطه تعلیمات گه قول تاپیشی اوچون ۲۵ میلیون دالر مالی یاردم بیریش نی تصویب قیلگن.
مذکور بانک نینگ ایتیشیچه، مذکور قیته توللنمه‌یدیگن یاردم تعلیمات اوچون دنیا همکارلیک بانکی تامانیدن توللنه‌دی کیم اقراء پروژه‌سی گه ۱۰۰ ینگی مکتب قوریلیشی اوچون یاردم بیریشی ممکن.
مذکور خبرنامه‌ده افغانستان اوچون دنیا بانکی دفتری باشلیغی هینری کرالی دن نقل قیلینیب کیلیشیچه: «افغانستان اوتگن ایکی دهه‌ده تعلیمات یخشی‌لنیشی اوچون کوپ یوتوق‌لرگه ایریشگن. شونده‌ی بیرحالده حاضر هم ۳.۵ میلیون باله مکتب کیتیشدن محروم دیر و افغانستان مکتب‌لریدن یریمی گه توغری بناسی یوق.» اونینگ ایتیشیچه، اوشبو قیته توللنمه‌یدیگن مالی یاردم یخشی بیر تعلیمات محیطی ایجاد ایتیلیشی و مملکت بویلب کوپینچه باله‌لر مکتب گه شامل بولیشی اوچون یاردم بیره‌دی.
اقراء پروژه‌سی خلق‌ارا رواجلنتیریش اداره‌سی آرقه‌لی حمایت بوله‌دی. شونینگدیک مذکور پروژه افغانستان قیته قوریلیش صندوقی و تعلیمات اوچون دنیا همکارلیک برنامه‌لری آرقه‌لی هم حمایت بوله‌دی.
تعلیمات اوچون دنیا همکارلیک برنامه‌سی نینگ اجرایی باشلیغی آلیس البرایت نینگ ایتیشیچه: «قیزلرنی تعلیماتی اوستیگه سرمایه یاتقیزیش بیر مملکت عمل گه آشیره‌دیگن اینگ یخشی ایشلردن بیری دیر. قیزلرنینگ تعلیماتی اوچون زمینه یره‌تیش، اقتصاد رواجله‌نیشی، تولد بوله‌دیگن باله‌لرنینگ اولیمی نی آلدینی آلیش و باله‌لر تغذیه‌سی یخشی‌لنیشی گه سبب بوله‌دی. تعلیمات اوچون دنیا همکارلیک برنامه‌سی ضرر کوره‌دیگن منطقه‌لرده میلیون‌لرچه قیز و ایرکک که مکتب کیتیش زمینه‌سی یره‌تیش و بو توغریده یاردم‌لریگه دوام بیریش اوچون متعهد دیر.»
دنیا بانکی نینگ خبرنامه‌سیده کیلیشیچه، اوتگن بیر دهه جریانیده افغانستان تعلیمات گه قول تاپیش توغریسیده کتته اَدیم‌لر کوتارگن، بیراق بو مملکتده حاضر هم کوپینچه باله‌لر تعلیمات دن محروم دیر.
