تاش چرخی آوازی چیققنیده، یولدن اوتیب قیتهدیگنلر یالغیز پیچاق چرخلنهیاتگن تاووشنی ایشیتیشلری ممکن؛ بیراق ییللر دوامیده شو چرخ آرقهسیده اولتیرگن بیر کیشی اوچون بو آواز بیر عمر دوام ایتگن محنت و حیات کورهشینینگ حکایهسی دیر.
کابل شهری کوچهلریدن بیرینینگ چیکهسیده، کیکسه بیر ایرکک بایسکلی یانیگه توختهگن. ۷۵ یاشلی محمد عثماننینگ یوزیدهگی هر بیر اجین ییللر دوام ایتگن محنت و مشقتنی بیلدیریب و آق سقالی ایسه حیاتی تجربهلرینینگ ینهده بیر بیلگیسی بولیب کورینهدی.
کابل شهرینینگ قلعهیزمانخان منطقهسیده جایلشگن کرایی بیر اویده حیات کیچیرهدیگن محمدعثمان، تورت قیزگه ایگه بولیب و یگانه اوغلی اولگنیدن کیین، ایکی نبیرهسینینگ سرپرستلیگی هم بوینیگه توشگن.
عثماننینگ حیاتی دایم اوشبو تاش و چرخ گه باغلیق ایمس ایکن؛ لیکن روزگار قیینچیلیکلری اونینگ هیچ تجربهسی بولمهگن بیر مسلک تامان تارتگن. «حیات قیینچیلیکلری سبب بو مسلکنی اورگندیم. بوندن آلدین سوو و انرژی وزیرلیگیده هیداوچی ایدیم. ۲۳ ییل هیداوچیلیک قیلدم. حیات کیچیریش جودهیم قیین بولگن ایدی. بیر کونی چاقو تیزلش اوچون کوچه گه کیلگن بیر کیشینینگ قولیده چاقو تیزلش ماشینینی کوردیم. کیین مین هم بیر ته ماشین آلیب شو ایشگه باشلهش گه قرار آلدیم.»
عثمان اوچون بو ایشنی باشلش قولی بولمهگن؛ لیکن استه-سیکین باشقهلردن تجربه آلیب و بو مسلکده ایشلب قالگن. تاش و چرخ بیلن ایلشیدن اوچ دهه اوتگن عثماننینگ ایتیشیچه: «ساغ بولگنیمده ایشلش اوچون چیقهمن. هوا قویاشلی بولسه یا-ده یامغیرلی ساعت ۹ ده اویدن چیقهمن و ایشیمگه دوام بیرهمن. حتا شام نمازینی هم تشقریده اوقهمن و کیین اویگه کیلهمن. ایشلش اوچون تورلی منطقهلرگه بارهمن.»
عثمان ایشینینگ باشیده، کوچهمه-کوچه پیاده یورهر ایکن و کیین اوشبو ایش آرقهلی قولگه کیلتیرگن درآمدیدن اوزیگه بیر بایسکل ساتیب آلالگن. لیکن اونینگ درآمدی بیللی بولمهی و حیات خرهجتلری اینیقسه اوی کرایهسی اونگه آغیر باسیم کیلتیرگن. «بعضا نیچه کون اوتهدی و فقط ۷۰ افغانی ایشله آلهمن. اوی کرایهمیز ۳۶۰۰ افغانی دیر. کونده ۱۲۰ افغانی توپلهشیم کیرهک. کیچهلر حتا آچ اوخلهگنمیز و بیران کیچه یالغیز بیرته کچالونی قینهتگنمیز یا-ده بیر ته بادرنگ ییگنمیز.»
اقتصادی قیینچیلیکلر یانیده، کسللیک هم عثمان اوچون کونلر اوتیشینی قیینلشتیرگن. اونگه کوره، یورهگینینگ ایکی تامیری یاپیلیب قالگن و اونینگ دوالش خرهجتیگه ایگه ایمس. «شفاکارلر اسپرنگ تشله دیدیلر که پولیم یوق. بیر لقمه نان پولینی تاپه آلیش اوچون قار بولسین، یامغیر بولسین یا-ده هوا قویاشلی بولسین، تشقریگه چیقهمن.»
برچه قیینچیلیکلر بولگنی بیرحالده، عثمان اهالیدن قطاری آرقهلی یاردم بیریلگنینی بیان قیلیب و ایتیشیچه، اوشبو حمایتلر سبب ایاغ اوستیگه توخته آلگن.
آرزولر توغریسیده سوال سورهگنیمده بیر نیچه ثانیه سکوت ایچیگه کیتیب و شوندهی دیدی: «آرزولر یکونلندی… یالغیز بالهلریم آچ قالمهسین بولهدی… آروزلریم بیتدی. چونکه حاضرگچه هیچ بیر آرزومگه ییتیشمهدیم و اوندن کیین هم هر نرسه آرزو قیلسم بلکیم فایدهسیز بولسه، بیراق ینه هم تینگری درباریدن امیدسیز ایمسمین.»
کون یکونلنیشی بیلن چرخ سیسی هم اوچهدی؛ لیکن ایرتهسی کون محمدعثمان ینه بایسکلینی آلیب، قریب ۳۰ ییلدن بیری تاش و چرخ آوازی آرقهلی قولگه کیلهدیگن بیر لقمه ناننی اختریش مقصد، شهر کوچهلری یولینی آلهدی.
