اوقیتووچی، تعلیم تیزیمی‌نینگ اینگ اساسی پایه‌لریدن بیری و نسللر کیله‌جگی شکللنیشیده تأثیرلی سیمالردن حسابـلـنه‌دی؛ بیراق مملکتده‌گی ایریم اوقیتووچیلر اقتصادی معمالر و تعلیمی امکانیت‌لر آزلیگی اولرنینگ ایش و حیاتیگه تأثیر کورستگنینی بیلدیره‌دیلر. اولر حکومت تامانیدن اوقیتووچیلرنینگ اقتصادی و اجتماعی احواللریگه ینه-ده کوپراق اعتبار بیریلیشینی ایسته‌یدیلر.
کابل‌ده خصوصی مکتب‌لردن بیری‌نینگ اوقیتووچیسی شکیلا هاشمیار‌نینگ ایتیشیچه، قیینچیلیکلر بولسه-ده، اما اوقووچیلرنینگ درس‌دن آرتگه قالمسلیگی و ترقیاتی اوچون ایشیگه دوام بیرماقده. بیراق او، اقتصادی احوال و تعلیمی امکانیت‌لر آزلیگینی ایشلری برابریده بولگن قیینچیلیک‌لردن عنوان قیله‌دی.
شو بیلن بیرگه، کابل شهری‌ده ینه بیر خصوصی مکتب اوقیتووچیسی مروه نظام، اقتصادی قیینچیلیکلر و تعلیمی امکانیت‌لر آزلیگی فقط اوقیتووچیلرنینگ قیینچیلیگی ایمس، بلکیم تعلیم جریانینی هم قیینچیلیککه دوچ قیلیشینی ایته‌دی.
کابل شهری مکتب‌لریدن بیری‌نینگ انگلیس تیلی اوقیتووچیسی حسنا لطیف هم، اوقیتووچی کونی فقط تبریکلش مناسبتی ایمس، بلکیم جمیعتده اوقیتووچی‌نینگ اورنی و قیمتینی ایسلب اوتیش اوچون بیر فرصت ایکنینی بیلدیرگن.
بیراق اوقیتووچیلرنینگ معمالری فقط برحال اوقیتووچیلر گه چیکلنیب قالمه‌یدی؛ بلکیم متقاعد اوقیتووچیلر هم ییللرچه خذمت قیلگنلریدن کیین، اقتصادی قیینچیلیکلر همده قیته ایش تاپیش زمینه‌سی یوق‌لیگی کبی معمالر بیلن روپه‌ره دیر. متقاعد ۴۱ یاشلی عبدالسبحان مسلم‌نینگ ایتیشیچه، ییللر درس بیریب و تقاعد قیلگچ، جدی اقتصادی معمالرگه دچار بولگن و مناسب بیر ایش تاپیش اوچون اورینگن، بیراق هنوزگچه مناسب ایش تاپه آلمه‌گن.
باشقه تاماندن، بیلیم یورتی استادلری هم اوقیتووچیلر اینیقسه اوزاق و چیکه منطقه‌لرده‌گی استادلر اوچون کیره‌کلی امکانیت‌لر یره‌تیلیشینی سوره‌یدیلر. بیلیم یورتی اوقیتووچیسی سمیع‌الله سعادت‌نینگ ایتیشیچه، اوقیتووچیلر جمعیت نینگ اونیملی بولیمی و اوز تعلیمی مسئولیتلرینی یخشیراق عملگه آشیریش اوچون امکانیت‌لر و قوللب-قوتلش‌لرگه محتاج دیرلر.
شو بیلن بیرگه، اسلام امیرلیگی معارف وزیرلیگی‌نینگ سوزلاوچیسی ذبیح‌الله همت سلام‌وطندارگه ایتیشیچه، اوتگن تعلیمی ییلده اوشبو وزیرلیگ‌نینگ تورلی بست‌لریده ۱۰ مینگدن آرتیق کیشی ایشگه آلینگن و بو وزیرلیگ اداری اوزگریشلر یاکی تنقیص نتیجه‌سیده اوز وظیفه‌لرینی قولدن بیرگن خادملرینی بوش بست‌لر موجود بولگن تقدیرده، قیته استخدام قیلیشگه حرکت قیلماقده.
برچه‌سی بیلن اوقیتووچیلر، اوقیتووچینی قوللب-قوتلش فقط بیر کون و تبریکلش بیلن چیکلنمسلیگی کیره‌ک، بلکیم اولرنینگ اقتصادی و اجتماعی احواللریگه اعتبار قره‌تیش، تعلیمی امکانیت‌لر یره‌تیش و مسلکی رواجلنیش‌لری اوچون زمینه یره‌تیش، تعلیم صفتی‌نینگ یخشی‌لنیشی و کیله‌سی نسللر اوچون یخشیراق کیله‌جک قوریشگه یاردم بیریشی ممکن ایکنینی ایته‌دیلر.
