کوکره‌ک بیزی سرطانی حقیده خبردارلیک آیی مناسبتی بیلن، ایریم شفاکارلر کوکره‌ک بیزی سرطانی عیاللر آره‌سیده اینگ کوپ اوچره‌یدیگن سرطان تورلریدن بیری ایکنینی ایته‌دیلر. اولرنینگ تأکیدلشیچه، عایله‌وی کسللیک، آرتیقچه وزن، جسمانی فعالیت آزلیگی و یاش‌نینگ اولغه‌یشی عیاللرنینگ اوشبو کسللیکه چلینیشیده مهم عامل بولیشی ممکن.
نسایی-ولادی شفاکاری سمیرا شهیررحیمی، آنه‌نینگ چقه‌لاغینی ایمیزمسلیگی هم عیاللرده کوکره‌ک بیزی سرطانیگه چلینیش خوفینی آشیریشی ممکن‌لیگینی ایته‌دی. او عیاللرده سرطان‌نی تیزراق انیقلش مهم ایکنینی تأکیدله‌یدی. او شونده‌ی دییدی: «نظارت قیلیش ممکن بولگن بیرقطار عامللر بار. مثلاً، آنه‌نینگ چقه‌لاغینی ایمیزیش. آرتیقچه وزنی بولگن عیاللر جسمانی فعالیت بیلن شغللنمسه و اوز وزنینی نظارت قیلسه، کوکره‌ک بیزی سرطانی خوفی کمیه‌دی. کوکره‌ک بیزی سرطانی‌نینگ عامللریدن بیری یاش دیر. آدم قنچه اولغه‌یسه کوکره‌ک بیزی سرطانیگه چلینیش خوفی هم شونچه آرته‌دی.»
باشقه تاماندن، ولایت‌لرده سرطان بیلن کسللنگن بیرقطار عیاللر سرطان حقیده ییترلی معلومات‌لری یوق‌لیگی و کسللیک‌نی انیقلش جریانی‌نینگ کیچیکیشی دوالنیش جریانینی ینه‌ده قیینلشتیرگنینی ایته‌دیلر.
لوگر ولایتیدن بولگن ۵۰ یاشلی خدیجه، کوکره‌ک بیزی سرطانیگه چلینگن. او اعتبارسیزلیگی و بی‌خبرلیگی سببلی کسللیگی اوج آلگنینی ایته‌دی. او شونده‌ی دییدی: «اولیگه هیچ نرسه‌نی بیلمسدیم. کوکره‌گیم آستیده بیر توگون بار ایدی. بیر نیچه کیشیگه کورستدیم، اولر هیچ نرسه ایمس توزه‌لیب کیته‌سیز دییشدی. کیین کونگلیم تینچیمه‌دی و منطقه‌ده‌گی کلینیک که باردیم. اولر هم کوریب هیچ نرسه دیمه‌دی. کیین باشقه بیر شفاکار گه مراجعت قیلدیم، او مینگه کابل گه باریشنی ایتدی.»
پروان ولایتی یشاوچیسی بولگن ۴۵ یاشلی روشن‌گل ایسه آلتی آی‌دن آرتیق وقت دوامیده کوکره‌ک بیزی سرطانی بیلن کسللنیب کیله‌یاتگنینی و کسللیک باشلنگنیدن ایکی آی اوتیب شفاکار گه مراجعت قیلگنینی بیلدیره‌دی. او شونده‌ی دییدی: «ایکی آی‌دن کیین آغریق تاپیلدی. شوندن کیین شفاکار گه باردیم. توگون جوده کتته‌لشیب قتیق‌لشگن ایدی. کیین واکسین آلگنیمدن سونگ او استه-سیکین یوقالدی. شوندن کیین قولتیق آستیم شیشیب باردی، آخر-عاقبت قولیم بوتونلی شیشیب، قتیق‌لشدی و یاتیب دوالنیشگه مجبور بولدیم.»
کابل‌نینگ قره‌باغ حدودی یشاوچیسی ۳۹ یاشلی آصفه ایسه کوکره‌گیده آغریق سیزگنیدن آلتی آی اوتیب شفاکار گه مراجعت قیلگنینی معلوم قیله‌دی. او شونده‌ی دییدی: «آلتی آی دوامیده کوکره‌گیمده توگون بار ایدی. شفاکار گه باردیم، ییتی مرته واکسین آلدیم و حاضر عملیات قیلیندیم. حاضر احوالیم یخشی‌راق.»
عمومی جراح متخصصی میرویس همت‌نینگ ایتیشیچه، تیکشیرو و نمونه اوتکزیلگندن سونگ سرطان بیلن کسللنگن بیمارنی دوالش جریانی باشلنه‌دی. اونینگ سوزلریگه کوره، دوالش اصولی تومور حجمی و کسللیک‌نینگ قیسی درجه‌ده رواجلنگنیگه باغلیق. اونینگ ایتیشیچه: «اگر تومور کیچیک بولسه و جراح کوکره‌ک‌نینگ اوزینی سقلب قالیب فقط تومورنی آلیب تشله‌ی آلسه، بو حالده فقط تومور یا کی توگون کوکره‌کدن آلیب تشلنه‌دی و عیال‌نینگ کوکره‌گی سقلنیب قاله‌دی. اما بیمار کسللیک‌نینگ جوده رواجلنگن باسقیچیده مراجعت قیلسه و تومور دوری بوتون کوکره‌ک‌نی ایگلله‌گن بولسه، بو حالده کوکره‌ک‌نینگ همه‌سی آلیب تشلنه‌دی.»
باشقه تاماندن، اسلام امیرلیگی ساغلیق‌نی سقلش وزیرلیگی سوزلاوچیسی شرافت‌زمان امرخیل، افغانستان‌نینگ تورت زونی‌ده ۵۰ اورینلی شفاخانه‌لر، کابل‌ده ایسه سرطان بیلن کسللنگن‌لرنی دوالش اوچون ۲۰۰ اورینلی شفاخانه تشکیل ایتیلگنینی ایته‌دی. او سرطان ساحه‌سیده‌گی طبی خذمت‌لر کینگه‌یتیریله‌یاتگنینی بیلدیره‌دی. او شونده‌ی دییدی: «اساسی مقصدیمیز کوکره‌ک بیزی سرطان‌نینگ آلدینی آلیش بوییچه ایش آلیب باریش و اونی اوز وقتیده انیقلش آرقه‌لی بو بیمارلرنی دوالش دیر. بوندن تشقری، کابل شهری‌ده ۲۰۰ اورینلی شفاخانه‌میز بار، بو شفاخانه‌ده هم خذمت‌لر کورسه‌تیلماقده. مقصدیمیز اوشبو خذمت‌لرنی ینه‌ده کینگه‌یتیریش دیر.»
میلادی ۱۹۸۵ییل اکتوبر آیی‌ده امریکا سرطان انجمنی تامانیدن جماعتچیلیک‌نینگ خبردارلیگینی آشیریش، کوکره‌ک بیزی سرطانینی ایرته انیقلشگه اونده‌ش و اوشبو کسللیککه چلینگن بیمارلرنی قوللب-قوتلش مقصدیده اکتوبر آیی، کوکره‌ک بیزی سرطانی حقیده خبردارلیک آیی دیب اعلان قیلینگن.
