خواهان، شکی، کوفآب، نسی و مایمی بدخشان ولایتینینگ اینگ اوزاقده جایلشگن تومنلریدن حسابلنهدی. بو تومنلر اهالیسی ییللردن بیری ستندرد و زمانهوی یوللری یوقلیگیدن عذاب چیکماقده.
اولرنینگ ایتیشیچه، بو تومنلر یوللرینینگ کوپینچه قسمی آمو دریا قیرغاغیده بولیب یول بوزوقلیگی، تارلیگی همده تاش توکیلیشی، دریا گه موترلرنینگ قولش خطرینی کوپهیتیرگن و هر ییلی اوشبو یونهلیشده اونلب یول حادثهسی یوز بیریب و یولاوچیلردن قربانلیک آلهدی.
نسی تومنیدن بولگن سیدهادی گه کوره، بو تومندن ولایت مرکزیگچه موترنینگ بیر تامانلمه اجاره حقی دییرلی تورت مینگ افغانی بولهدی و کسللرنی تشیش پیتیده بو مقدار پول اوچ برابر آشیریلهدی. او شوندهی دییدی: «یوللری بوزوق، یازده سوو تاشقینی و قیش فصلیده ایسه قار کوچیشی و تاش توکیلیشی قیینچیلیگی بیلن دچار میز. فیضآباد مرکزی دن نسی، کوفآب یا کی مایمی گچه تورت-بیش کونلیک یول، تیریک ییتیشیش یا کی ییتمسلیک نامعلوم. یا موتر چپه بولهدی یا کی سوو تاشقینی گه دوچ بولهسیز، مسئوللردن بوتوغریده دقت قیلیشلرینی ایستهیمیز.»
خواهان تومنیدن بولگن پرویزنینگ ایتیشیچه، بو تومندن فیضآباد گه باریش اوچون تخمیناً ۱۰ ساعتلیک یولنی کیزیب اوتیش کیرهک و قیش فصلیi قار کوچیشی و تاغ سیلجیشی سببلی، بو یول هفتهلر دوامیده یولاوچیلر یوزیگه یاپیلهدی. اونگه کوره: «کسل بولسه اونی مرکز گه آلیب باریش جوده قیین، کسلنینگ احوالی آغیر بولسه شفاخانه گه تیریک ییتکزیش احتمالی و باشقه قیینچیلیک شو کی تجارتی بویوملرنی تومن گه تشیش یوقاری توشهدی، یشاوچیلر اوچون قیین و یوقاری نرخده ساتیب آلیشگه مجبورلر.»
شو بیلن بیرگه، درواز تومنی یشاوچیلری، نیچه مراتبه قیینچیلیکلرینی محلی مسئوللر بیلن شیریک قیلگن بولسه-ده، بیراق مذکور یوللرنینگ قیته قوریش اوچون عملی اقدام قیلینمهگنینی ایتهدیلر.
درواز بالا تومنیدن بولگن علی شیرزاد شوندهی دییدی: «نیچه مراتبه ولایت عملدارلری و باغلیق ادارهلر گه مراجعت قیلدیک – سرکلر قوریلیشی اوچون. مسئوللر نیچه مراتبه همکارلیک قیلیش وعدهسینی بیریشدی، بیراق بو وعدهلر حاضرگچه عملگه آشیریلمهگن.»
باشقه تاماندن، درواز تومنی هیداوچیلریدن بیرقطارینینگ ایتیشیچه، یوللر بوزوقلیگی موترلرینینگ تخنیکی قیینچیلیک تاپیشیگه سبب بولگن. دروازده هیداوچی فیروز، درآمدیدن بیر قسمینی موترینینگ تعمیرلشگه صرفلشینی بیلدیرهدی. او شوندهی دییدی: «کوپینچه قیینچیلیک بیلن دچار میز. یوللر کوپ بوزوق؛ موتر تیزلیکده پنچر بولهدی و باشقه قیینچیلیک هم تاپهدی؛ یولاوچیلردن یول حقی آلهدیگن پول بیر قسمینی موترنینگ تعمیرلش اوچون صرفلهیمیز.»
درواز تومنیده هیداوچیلردن باشقه بیری فایق هم شوندهی دییدی: «درواز تومنلری یونهلیشی جوده بوزوق؛ بو یونهلیشدن قتنهگن پیتده موترلرنینگ جهازلری و پرزهلرینی المشتیریش گه مجبور بولهمیز؛ هردایم حادثه یوز بیریش قورقووی بیلن قتنهیمیز.»
اوشبو یشاوچیلر اسلام امیرلیگی اینیقسه فواید عامه وزیرلیگیدن، بدخشان تومنلرینینگ یوللرینی قوریش بارهسیده دقت قیلیشینی سورهیدیلر.
شو بیلن بیرگه، بدخشان ولایتی فواید عامه ریاستینینگ لایحهلر بوییچه انجنیری عبدالباسط، بو ریاست نیچه مراتبه اوشبو یوللرنینگ قیینیچلیگینی حل ایتیش اوچون تلاش قیلگن و ییترلی معلوماتلرنی باغلیق ادارهلر گه یوللـهگنینی بیلدیرهدی. او شوندهی دییدی: «بدخشان فواید عامه ریاستی درواز تومنلری یولینینگ قیینچیلیگینی باغلیق ادارهلر بیلن شریک قیلگن و تیزلیکده بو یوللرنینگ قیته قوریش امکانیتی یرهتیلیشگه امیدوارمیز.»
درواز بیشتله تومنلری یولی، هردایم قانلی یول حادثهلری گواهی بولیب کیلگن. بو تومن یشاوچیلرینینگ ایتیشیچه، یول بوزوقلیگی، تاغ سیلجیشی و حمایهوی دیوارلر یوقلیگی، بوندهی فاجعهلی حادثهلرنینگ اساسی سببلری دیر.
