بیر هیأت ییتکچیلیگیده ترکیه سفر قیلگن اسلامی امارت تشقی ایشلر وزیرلیگی سرپرستی امیرخان متقی، اوتگن کون مذکور مملکت تشقی ایشلر وزیری مولود چاووش‌اوغلو بیلن اوچره‌شگن.
ترکیه نینگ آناتولی خبرگزارلیگی نی گزارش بیریشیچه، بو مملکت تشقی ایشلر وزیری بو اوچره‌شوودن کیین خبری بیر ییغین اوتکزیب و اوشبو اوچره‌شوو توغریسیده تفصیلات بیرگن.
چاووش اوغلو نینگ ایتیشیچه، اسلامی امارت بیلن اوتکزیلگن اوچره‌شووده ینه بیر مرته، افغانستان ده بیرلیک تأمین‌لنیشی اوچون همه‌شمول بیر دولت ایجاد ایتیلیشی اوستیگه اورغولنگن. شونینگدیک اونینگ اورغولشیچه، طالبلرنینگ یانیده برچه قومی و مذهبی گروه‌لر هم دولت گه حضور تاپیشی کیره‌ک.
تشقی ایشلر وزیری اوشبو خبری ییغینده ایتیشیچه، «مذکور گروه اوتگن کیچه دوحه ده تورلی مملکتلر نماینده‌لری جمله‌دن آمریکا بیلن اوتکزگن اوچره‌شووده، ترکیه سفر قیلیش‌لرینی سوره‌گن.»
مولود چاووش‌اوغلو نینگ کوپه‌یتیریشیچه، بو معلومات دن قول تاپگنیدن کیین اوز فکرینی «ایناغه‌لیک» بیر شکلده اورته گه قویگن. اونینگ ایتیشیچه، «بیزلر طالبان نینگ حاضرگی حکومتی بیلن تعامل قیلیش نینگ اهمیتی نی حاضرگچه دنیا جماعه‌چیلیگی گه توضیح بیرگن‌میز، حاضر دنیا مملکت‌لری بو ایش گه پی ایلتگن و خواه طرف‌سیز و یا مغرضانه بیر شکلده طالبان بیلن علاقه گه دیر.»
بیزلرنینگ فیسبوک صحیفه‌میزگه باش اورینگ!
شونینگدیک او تعامل چارچوبه‌سیده عاجل انسان‌دوستلیک یاردملر یوباریلیشی اوستیگه اورغولب و ایتگن که، ترکیه نینگ قیزیل آیی ۳۳ مینگ تُن‌لیک یاردمی بیر محموله نی پاکستان دن افغانستان گه تحویل بیرگن.
شونینگدیک ترکیه تشقی ایشلر وزیری نینگ اورغولشیچه، افغانستان نینگ اقتصادی سقوطی قیلمه‌سی کیره‌ک. اونینگ ایتیشیچه، «افغانستان پوللری و حساب‌لرینی افغانستان تشقری‌سیده باغله‌گن مملکتلر، حقوق تولله‌نیشی اوچون ملایم‌لیک کورسه‌تیش‌لری کیره‌ک. بو توغریده سونگی اوزگریشلیکلر حقیده اولردن معلومات آلدیک.»
چاووش‌اوغلو گه کوره، طالبان اعلام قیلگن که افغان مهاجرلر مملکت‌لریگه قیتیش نی ایسته‌گن صورتده، هر قنده‌ی همکارلیک قیلیش گه حاضرلر. شونینگدیک اونینگ ایتیشیچه، قیزلرنینگ تعلیم آلیشی و عیاللرنینگ ایش قیلیشی توغریسیده اوز توصیه‌لرینی طالبان بیلن شریک قیلگنلر.
سونگی کونلرده اسلامی امارت نماینده‌لری، آمریکا و اروپا بیرلیگی نماینده‌لری و غربی دیپلماتلر بیلن دوحه ده اوچره‌شگن و اولر ایسه مرکزی بانک سرمایه‌لری نینگ آزاد ایتیلیشی، انسان دوست‌لیک یاردملر و ینگی حکومت‌لری بیلن تعامل قیلینیشی نی سوره‌گن.
