مهاجرلر وزیرلیگی نینگ رسمی آماری اساسیده، اوروش، ناتینچلیک، ایش‌سیزلیک و قشاقلیک باعث افغانستان یشاوچی‌لریدن کمیده ۸ میلیونی مملکت ایچی و تشقری‌سیده آواره بولگن.
حاضر طالبان و حکومت نماینده‌لری آره‌سیده تینچلیک سوزلشوولری باشله‌نیشی بیلن افغانستان ده تینچلیک تأمین‌لنیشی توغریسیده امیدوارلیکلر کوپه‌یگن. شو یوزه‌دن ناتینچلیک، اقتصادی قیینچلیکلر و ایش‌سیزلیک باعث مملکت نی ترک قیلیب و قیین یوللر و قاچاق آرقه‌لی اوزلرینی اروپالیک مملکت‌لرگه ییتیشتیرگن مهاجرلردن قطاری نینگ ایتیش‌لریچه، افغانستانلیکلرارا سوزلشوولر باشلنگنیدن خرسند بولگنلر. اولرگه کوره، تینچلیک سوزلشوولری نتیجه بیریب و افغانستان ده تینچلیک تأمین‌لنگن صورتده، مملکت‌لریگه قیتیش‌لری ممکن.
عتیق‌الله تلاش ۴ ییل آلدین قاچاق یولی آرقه‌لی اوزینی فرانسه گه ییتیشتیرگن و شونینگدیک احمد امامی ۵ ییل آلدین ایران یولی آرقه‌لی ترکیه و او ییردن یونان و نهایتده اوزینی آلمان گه ییتیشتیرگن.
اوشبو ایکی افغانستانلیک مهاجرنینگ ایتیش‌لریچه، تینچلیک کیلگن صورتده، افغانستان گه قیتیب و اوز مملکت‌لری اوچون ایش قیله‌دیلر.
مهاجرلر وزیرلیگی مسئوللری نینگ ایتیش‌لریچه، اولر تینچلیک دن کیین عودت ناملی بیر برنامه اوستیگه ایش قیلگنلر کیم مذکور برنامه گه مهاجرلرنینگ قیتیشی قنده‌ی مدیریت قیلیش، ییر ترقه‌تیش و اولر گه ایش زمینه‌سی یره‌تیش شامل بوله‌دی.
مهاجرلر وزیرلیگی سوزلاوچیسی رضا باهر نینگ ایتیشیچه، مملکت گه قیته‌دیگن کیشی‌لرگه ایش زمینه‌سی یره‌تیلیشی اوچون ایش و اجتماعی ایشلر وزیرلیگی بیلن بیر کیلیشوونامه امضاله‌گن‌میز.
شونینگدیک افغانستان دولتی مهاجرلرگه ایش زمینه‌سی یره‌تیش و اولرگه ییر ترقه‌تیش اوچون ژینوا ییغینیده قطار وعده‌لر بیرگن.
شونینگدیک ایش و اجتماعی ایشلر وزیرلیگی رسمی‌لری نینگ ایتیش‌لریچه، مملکت گه قیته‌دیگن مهاجرلرگه ایش زمینه‌سی یره‌تیلیشی اوچون مهاجرلر وزیرلیگی بیلن کیلیشوونامه امضاله‌گنلر. اولرگه کوره، بو کیلیشوونامه اساسیده، مملکت گه قیته‌دیگن کیشیلردن ۴۰ فایزی گه ایش زمینه‌سی یره‌تیلیشی اوچون یارده بیریله‌دی.
عین حالده، افغانستان ده مهاجرلیک معلومات مرکزی یا «MRC» نینگ ایتیشیچه، ناقانونی مهاجرلیک توغریسیده معلومات بیریش اوچون فعالیت قیله‌دی.
تینچلیک دن کیین مهاجرلر قیینچیلیک‌لری حل ایتیلیشی و تیکشیریلیشی حقیده افغانستان بوییچه مهاجرلیک خلق‌ارا تشکیلاتی یا IOM نینگ فکرینی آلیش ایسته‌دیک، بیراق مذکور نهاد صحبت اوتکزیش اوچون حاضر بولمه‌دی.
ایتیش کیره‌ک کیم افغانستان ده نیچه ییل‌لیک اوروش، ناتینچلیک و ایش‌سیزلیک باعث آواره بولگن ۸ میلیون مهاجردن کمیده ۲ میلیون ۵۰۰ مینگی ایران و ۲ میلیون و ۳۴۰ مینگی ایسه پاکستان ده حیات کیچیره‌دی.
