بوگون “یکشنبه” ۲۰ جون خلق ارا باش‌پناه ایزلاوچیلر ایامی بیلن ماس دیر. ۲۰ جون بیرلشگن ملتلر تشکیلاتی تامانیدن باش‌پناه ایزلاوچی‌لرگه حرمت قیلیش اوچون اولر کونی نامی‌گه قوییلگن. خلق ارا باش‌پناه ایزلاوچیلر کونیدن دنیا بیرقطار مملکت‌لریگه نشان‌لنه‌دی.
اوشبو تاریخ دن بیرلیک ایجاد قیلیش و باش‌پناه ایزلاوچیلر قیین‌چیلیک‌لرینی درک قیلیش اوچون نشان‌لنه‌دی، لیکن دنیا کوپ‌قطار مملکت‌لریگه باش‌پناه ایزلاوچی‌لرنینگ وضعیت‌لری خواطرلنترووچی دیر. باش‌پناه ایزلاوچی‌لردن کوپ قطارینی سودان، سومالی، سوریه، افغانستان و باشقه کم‌بغل و ناتینچ مملکت‌لرنینگ یشاوچیلری تشکیل بیره‌دی.
اوشبو مملکت یشاوچیلری جان‌لرینی قوتقریش اوچون مملکت‌لرینی ترک قیله‌دیلر؛ لیکن هدف تعیین قیلگن مملکت‌لرگه باریش اوچون کوپ‌قطار قیین‌چیلیکلر بیلن روپه‌ره بوله‌دیلر.
افغانستان یشاوچی‌لریدن بیری رضا ناتینچلیکلر سبب، ۴ ییل آلدین ترکیه گه بارگن. اونینگ ایتیشیچه، بیر ییل‌گچه شغل و ساغلیک خذمت‌لر شامل بوتون دستلبکی حقوق‌لردن محروم ایدی. رضا نینگ کوپه‌یتیریشیچه، ترکیه ده کیم‌لیگی بولمه‌گن کیشی‌لر کسلخانه‌گه مراجعت قیله آلمه‌یدی و بو موضوع باش‌پناه ایزلاوچی‌لرگه قرشی اساسی قیین‌چیلیک‌لردن حساب‌لنه‌دی.
اونینگ ایتیشیچه، کرونا ویروسی ترقه‌لگنی دن سونگ، قیینچلیکلری ایکی برابر بولگن. «ایش اوچون رخصت بیریلمه‌یشی اساسی قیینچلیکلردن دیر. باش‌پناه ایزلاوچیلر ترکیه ده ایش قیله آلمه‌یدی و کیم‌لیک یوق‌لیگی باشقه قیین‌چیلیک‌لردن بیری دیر و کمیده بیر ییلدن سونگ، قولگه کیلتیردیم.»
باش‌پناه ایزلاوچی‌لردن باشقه بیری حبیب نینگ ایتیشیچه، ۷ ییلدن بویان اندونیزیا ده تیریک‌چیلیک قیله‌دی و یمان بیر وضعیت ده کمپ ده حیات کیچیره‌دی.
حبیب نینگ کوپه‌یتیریشیچه، اندونیزیا ده حیات کیچیره‌دیگن باش‌پناه ایزلاوچی‌لردن کوپراغی دستلبکی حقوقلریدن محروم دیرلر و باش‌پناه ایزلاوچی‌لردن کوپ قطاری ییل‌لرچه کمپ و محبوس‌لرگه قالیش‌گه مجبور بوله‌دیلر.
حبیب گه کوره، کرونا ویروسی ترقه‌لگنی سبب، ایلچی‌خانه‌لر باغلنگن و باش‌پناه ایزلاوچی‌لرنینگ ایش‌لرینی ایلگری آلیب باریش جریانی توخته‌تیلگن.
اوشبو باش‌پناه ایزلاوچی بیرلشگن ملتلر تشکیلاتی دن وضعیت‌لری یخشی‌لنیشی اوچون تاثیرلی ایش‌لر انجام بیریشی‌نی سوره‌یدی.
باش‌پناه ایزلاوچی‌لردن باشقه بیری مینا اسدی ۲۰۱۵- ییلدن بویان اندونیزیا ده حیات کیچیره‌دی. مینا سپورت‌چی دیر و کابلده سپورتی فعالیت‌لری سبب، تورلی آدرس‌لردن تهدید آستیگه قرار بیریلگن.
او، اندونیزیا گه بارگنیدن سونگ، باله‌لر و یاش ییگیت لرگه کاراته سپورتی‌نی تعلیم بیریش اوچون سعی و حرکت قیلگن. بیرینچی کون‌لرده کیچیک بیر جایده نیچه شاگرد بیلن ایشگه باشله‌گن، لیکن حاضرده کوپ قطار باش‌پناه ایزلاوچی‌گه تعلیم بیره‌دی.
باشقه تاماندن اندونیزیا ده بولگن باش‌پناه ایزلاوچیلر ایکی کوندن بویان «هزاره ریفیوجیز HazaraRefugees#» نامی‌ده توییتر ده بیر کمپاین یولگه قوییب اندونیزیا و تایلند ده باش‌پناه ایزلاوچی هزاره‌لر اوچون عدالت ایسته‌یدیلر.
عین‌حالده، آمریکا نینگ کابلده‌گی ایلچی‌خانه‌سی نینگ اعلان قیلیشیچه، خلق ارا باش‌پناه ایزلاوچی ایامی مناسبتی بیلن مهاجرلر و ایچکی جای‌سیز بولگن‌لردن حمایت قیله‌دی.
