کابل شهرینینگ تورلی ناحیهسیدهگی قول اوستیده سودا ساتهدیگنلردن قطاری، بلدیه ایشلاوچیلرینینگ ناتوغری یاندهشووی و ایش اوسکونهلری ییغیلیشیدن شکایت قیلیب و ایتیشلریچه، اونچهلیک بازار یوقلیگی و اقتصادی قیینچیلیکلر یانیده کوپینچه باسیملر و چیکلاولر بیلن روپهرهلر.
اولرنینگ کوپهیتیریشلریچه، بلدیه ناحیهلر مأمورلریدن قطارینینگ یاندهشووی، ایش وضعیتینی قیینلشتیریشگه علاوه، اولرگه کوپینچه زیانلرنی هم ییتیشتیرگن. کابل شهرینینگ ۱۷-ناحیهسیده میوه ساتووچی کراچیسی بولگن امیدنینگ ایتیشیچه: «کراچی یا-ده ایش اوسکونهلریمیزنی بیر لقمه حلال نان تاپیش اوچون کیلتیرهمیز. همکارلیک اورنیده بیزلر بیلن یامان شکلده یاندهشیلهدی. مالی امکانیتیمیز بولگنیده، هیچ قچان سرک یانیده قول اوستیده نرسه ساتمهیمیز.»
کابل شهرینینگ ۴ و ۱۱-ناحیهلریدهگی قول اوستیده سودا ساتهدیگنلردن فردین و آرشنینگ ایتیشلریچه، نیچه مرته کراچیلری و ایش اوسکونهلری ناحیهلردهگی مامورلر آرقهلی ییغیلگن. فردیننینگ بو توغریده ایتیشیچه: «دایم قیینچیلیک و توسیقلیک بیلن روپهره بولهمیز. نیچه مرته اوسکونهلر و کراچیمیزنی آلیب کیتگنلر. کراچیلر قیمتی یوقاری دیر؛ بیراق ینه هم آلیب کیتهدیلر.»
شونینگدیک آرش گه کوره: «نیچه مرته توارلریمیز یا-ده کرچیمیزنی آلیب کیتگنلر. بیر کراچینینگ قیمتی کوپ کم بولسه، سکیز مینگ افغانی بولهدی. اونی آلیب کیتگنلریده برچه سرمایه و زحمتیمیز اورتهدن کیتهدی.»
شوندهی بیرحالده، کابل بلدیهسی مسئوللرینینگ ایتیشلریچه، قول اوستیده سودا ساتهدیگنلر قیینچیلری حلی اوچون بیر قطار برنامهلرنی قولگه آلگنلر. بو توغریده کابل بلدیهسینینگ فرهنگی ایشلری بوییچه مصلحتچیسی نعمتالله بارکزینینگ سلاموطندار گه ایتیشیچه: «سونگی پیتلرده افغانستان اسلام امیرلیگی رهبری تامانیدن بیللی بیر بویروغ صادر بولگن که اونینگ اساسیده، کابل شهریده قول اوستیده سودا ساتهدیگنلر اوچون باشی یاپیلگن بازار توزهتیلیشی کیرهک. حاضر قول اوستیده سودا ساتهدیگنلر اوچون جای بیللی بولگن، مثلا چمن حضوریده بیللی ساحهلر.»
بو آرهده، کابل یشاوچیلریدن قطارینینگ ایتیشلریچه، سرکلر و پیاده یوللرده قول اوستیده سودا ساتهدیگنلر حضوری، گوجوملیک و باریب-کیلیشده قیینچیلیکنی یرهتگن.
اولر مسئوللردن، قول اوستیده سودا ساتهدیگنلرنینگ قوللب-قوتلنیشی یانیده، شهر نظمیگه هم توجه قرهتیلیشینی سورهگنلر. کابل شهری ایکینچی ناحیه یشاوچیسی مصطفانینگ ایتیشیچه: «سرکلردن قطاری قول اوستیده سودا ساتهدیگنلر و ترتیبسیزلیک سبب بند بولهدی، گوجوملیک اورته گه کیلهدی. بو مسئله ایش، حیات و اهالینینگ آراملیگیگه سلبی تاثیر قویگن.»
شونینگدیک کابل شهری ۱۷-ناحیه یشاوچیسی فردوسنینگ بو توغریده ایتیشیچه: «سرکلرده قول اوستیده سودا ساتهدیگنلر حضوری گوجوملیک و اهالینینگ باریب کیلیشیده قیینچیلیکنی اورته گه کیلتیرگن. بعضا بیلیم یورت یولیده سرک یانیده کراچیلرینی قویگن قول اوستیده سودا ساتووچیلر اوچون، کمیده ۲۰ دقیقه صنفگه کیچ بارهمن.»
کابل ده قول اوستیده سودا ساتیلیش و قول اوستیده سودا ساتهدیگنلرنینگ بارلیگی، کوندهلیک حیات حقیقتینینگ بیر قسمیگه اَیلنگن. اوتگن ییللرده ایشسیزلیک و اقتصادی قیینچیلیکلر کوپهیگنی سبب، یشاوچیلردن کوپ قطاری حیات خرهجتلرینی تامینلش اوچون قول اوستیده سودا ساتیشگه یوز کیلتیرگنلر که بو وضعیت، یشاوچیلرگه ایش امکانیتینی یرهتگنی یانیده، شهرنینگ بیر قطار بولیملریده گوجوملیک، ترتیبسیزلیک و ترافیکی قیینچیلیکلرگه سبب بولگن.
