کابل شهری ده موتر هیداوچیلردن بیرقطاری، تیل نرخی یوقاری‌لیگیدن شکایت قیلیب ایتیشلریچه، کونسه‌یین تیل قیمت بولیشی باعث درآمدلری کمه‌یگن.
کابل شهری برکی منطقه‌سیده تکسی هیداوچی صبور نینگ ایتیشیچه، سونگی نیچه کون ده ۷۰ فایز کونده‌لیک درآمدی گه تیل ساتیب آلماقده.
او نینگ کوپه‌یتیریشیچه: «موتر ده یولاوچیلرنی مقصد جای گه آلیب بارگونچه، تیل بیتیشیدن تشویش ده من. سونگی نیچه کون ده یولاوچیلر دن آله‌دیگن پولیم گه تیل ساتیب آله‌من، جوده قیین دیر.»
بیزلرنینگ فیسبوک صحیفه‌میزگه باش اورینگ!
کابل شهرنو یشاوچیسی و یوک تاشووچی موتری بولگن عبدالرحمان گه کوره، تیل قیمت بولیشیدن کیین، عایله اعضالری نینگ احتیاج‌لرینی تأمینلش اوچون قیینچیلیک بیلن دوچ بولگن.
اونگه کوره: «هر کونی ۸۰۰ افغانی گه ۱۰ لیتر تیل ساتیب آله‌من، عین‌حالده بو پول گه قره‌گنده آز ایشله‌ی من، عایله خرچینی تأمین قیلمه‌یدی، ایشله‌گن پولیم گه تیل ساتیب آله‌من.»
باشقه تاماندن، کابل شهری ده تیل ساتووچیلردن بیرقطاری نینگ ایتیشلریچه، سونگی کون‌لرده تیل نرخی سیزیلرلی درجه ده آشگن.
کابل شهری شهرآرا منطقه‌سیده تیل ساتووچیلیگی بولگن فهیم گه کوره: «بوگون پترول تیلی ۸۰ افغانی و دیزل تیلی ۷۶ افغانی دیر، بیر هفته آلدین بیر لیتر پترول تیلی ۷۷ و دیزل تیلی ۶۷ افغانی ایدی. تیل ساتیب آلیش گه قیینچیلیک‌لری بار اینیقسه تکسی هیداوچیلر کوچ‌لری ییتمسلیگی اوچون صفت‌سیز تیل ساتیب آله‌دیلر.»
سالنگ قتناو یولی یاپیلیشیدن کیین پترول تیلی ۲۲ افغانی و سونگی بیر هفته ده ۳ افغانی گه آشگن و دیزل تیلی ۱۵ افغانی و سونگی بیر هفته ده ۹ افغانی قیمت بولگن.
بیزلرنینگ «ایکس» ترماغی ده هم تعقیب قیلینگ!
عین‌حالده، افغانستان سوداگرلیک و سرمایه یاتقیزیش اتاقی گه کوره، سالنگ قتناو یولی یاپیلیشی و دنیا بازارلریده تیل نرخی یوقاری‌لیگی باعث، مملکت ده تیل نرخی آشگن.
افغانستان سوداگرلیک و سرمایه یاتقیزیش اتاقی اورین باسری خان‌جان الکوزی نینگ سلام‌وطندار گه ایتیشیچه: «هرات، نیمروز، فراه و تورغندی یوللری آرقه‌لی تیل وارد قیلیش مقصدیده سعی‌وحرکت قیله‌یپمیز، بو یوللر بیلن کابل گه تیل وارد قیلینسه تیل قیمتی اوستیگه تاثیر قیله‌دی، لیکن تیزلیک بیلن ایمس چونکه او یوللر اوزاق و مصرفی هم کوپ دیر.»
افغانستان سوداگرلیک و سرمایه یاتقیزیش اتاقی نینگ معلوماتی اساسیده هر کونی اوزبیکستان، تورکمنستان، قزاقستان، روسیه و ایران دن آلتی مینگ تُن تیل وارد و هر ییلی مملکت گه ۲۰۰ میلیون دالرلیک تیل وارد ایتیله‌دی.
