مملکت نینگ شمال و شمال‌شرقی ولایت‌لر نینگ یشاوچیلری، یولاوچی تاشووچی موترلر نینگ تکتی قیمت‌لیگیدن شکایت قیله‌دیلر.
ایش قیدیریب کابل گه کیلگن تخارلیک لعل‌جان، زمینی ترانسپورتی شرکت‌لر نینگ تکتی قیمت‌لیگیدن نالیب ایتیشیچه، یشاوچیلر نینگ اقتصادی قیینچیلیگی باعث تکت نرخینی توللـه‌ی آلمه‌یدیلر.
اونگه کوره: «زمینی ترانسپورتی شرکت‌لر نینگ تکتی قیمت دیر، تکت پولی ۸۰۰ و ۹۰۰ افغانی دیر توانیم یوق‌لیگی سبب چنده ییغیش گه مجبور بولدیم.»
بیزلرنینگ فیسبوک صحیفه‌میزگه باش اورینگ!
شونینگدیک، جوزجان مرکزی شبرغان شهری یشاوچیسی ظاهر اوزینی درمانلش اوچون کابل گه کیلگن، اسلام امیرلیگی دن ترانسپورتی شرکت‌لر گه ینگی نرخ‌نامه تعین قیلیشینی طلب قیله‌دی.
او نینگ کوپه‌یتیریشیچه: «اوزیمنی درمانلش اوچون کابل گه کیلگن‌من، عموماً موترلر ساعت ۲ و ۴ بجه حرکت قیله‌دیلر، ترانسپورتی شرکت‌لر نینگ تکتی قیمت دیر، اسلام امیرلیگی دن بوتوغریده دقت قیلیشینی ایسته‌یمیز.»
عین‌حالده، پایتخت ترانسپورتی ترمینل مسئوللری یوللر بوزوق‌لیگی، موترلر نینگ تخنیکی قیینچیلیک‌لری و نفتی ماده‌لر نرخی یوقاری‌لیگینی، یولاوچی تاشووچی موترلر نینگ تکت‌لری قیمت‌لیگی عاملی عنوان قیله‌دیلر.
پایتخت ترانسپورتی ترمینل سوزلاوچیسی حامد ابراهیمی نینگ ایتیشیچه: «سالنگ قتناو یولی بوزیلگن و قیته قوریلیشی کیره‌ک و ترانسپورتی شرکت‌لر کوپراق یوللر بوزوق‌لیگیدن نالیدیلر.»
بیراق آسیا ترانزیت ترانسپورتی شرکت مسئوللریدن بیری ایمل علی‌زوی، ترانسپورت وزیرلیگی نینگ حاضرگی نرخ‌نامه‌سیدن شکایت قیلیب ایتیشیچه، اوشبو نرخ‌نامه اولر نینگ ایشی اوستیگه سلبی تأثیر قیلگن.
اونگه کوره: «ترانسپورت وزیرلیگی ترانسپورتی شرکت‌لر نینگ قیینچیلیگینی نظر گه توتمسدن نرخ‌نامه تعین قیلگن و اولر اوشبو نرخ‌نامه باعث ایریم قیینچیلیک‌لر بیلن روپه‌ره‌لر.»
بیزلرنینگ توییترده هم تعقیب قیلینگ!
عین‌حالده، ترانسپورت و ملکی هوانوردلیک وزیرلیگی مسئوللری نینگ ایتیشلریچه، اوشبو وزیرلیک تامانیدن تعینلنگن نرخ‌نامه نی قیته کوریب چیقه‌دیلر.
پایتخت ترانسپورتی ترمینل ده ترانسپورت وزیرلیگی نینگ نماینده‌سی حنیف بخشی گه کوره: «زمینی ترانسپورتی شرکت‌لر اوچون ترانسپورت وزیرلیگی تامانیدن تعینلنگن نرخ‌نامه دن ایکی آی اوتماقده؛ اما زمینی شرکت‌لر اوشبو نرخ‌نامه باعث زیان کورگنینی ایته‌دیلر. بیراق ترانسپورت وزیرلیگی اولکه یشاوچیلری و ترانسپورتی شرکت‌لر نینگ قیینچیلیگی حلی مقصدیده سعی‌وحرکت قیلماقده.»
ایتیش کیره‌ک که، حاضر پایتخت ترانسپورتی ترمینلی ده ۵۰ دن آرتیق زمینی ترانسپورتی شرکت و ۱۰۰ دن آرتیق یولاوچی تاشووچی بس موجود دیر، اولر شمال و شمال‌شرقی ولایت‌لر نینگ مینگلب یولاوچیلری گه باریب_کیلیش زمینه‌سینی یره‌تگنلر.
