کابل یشاوچیلریدن بیرقطاری، عصردن کیین و کیچه تاماندن شهر موترلرنینگ هیداوچیلری اوز باشیمچهلیک بیلن یول حقینی آشیرهدی و انده-سنده کون دوامیگه نسبتن ایکی برابر آلهدیلر.
کابل شهری ۱۱ ناحیه یشاوچیسی احمد، کیچ قورون ایشدن قیتیش پیتیده، موتر آزلیگی سببلی یول حقینی کوپ بیریش گه مجبور بولگنینی ایتهدی.
او شوندهی دییدی: «عصردن کیین یول حقی کوپ آلینگن، کیچ قورون بولگنده چونکی لینی موتر اونچه تاپیلمهیدی یول حقی کوپ آلینگن. اگر لینی موترنینگ یول حقی ۲۰ افغانی بولسه موتر آز دیب ۵۰ افغانی آلیشهدی کوپینچه پیتلر بوندهی قیینچیلیککه دوچ کیلگن من.»
کابل شهری ۱۵ ناحیه یشاوچیسی فردین خان، کیچه تاماندن شهر موتر هیداوچیلری اوز باشیمچهلیک بیلن یول حقینی کوپ آلیشیدن شکایت قیلهدی. اونگه کوره: «شام پیتی ساعت ۶:۰۰ یا کی ۷:۰۰ اطرافیده، پنجصد فامیلی گچه یول حقی ۳۰ افغانی دیر ۵۰ افغانی گه آشهدی. نهفقط بو یونهلیش بلکی ده افغاناندن سرای شمالیگچه هم شوندهی، بو یول قیسقه دیب ایتسنگیز اوشبو مقدار پول دولت تامانیدن تعیین قیلینگنینی ایتیشهدی.»
شو بیلن بیرگه، هیداوچیلردن بیرقطارینینگ ایتیشلریچه، تیل و گاز قیمت بولگنی سببلی یول حقی هم آشگن.
کابل شهریده هیداوچیلردن محمدحکیم شوندهی دییدی: «هیچ بیر ارگان تامانیدن نرخنامه تعیین قیلینمهگن بیز فقط یولاوچی بیلن کیلیشهمیز، برقرار نرخ یوق. یولاوچی کوپ بولسه و موتر آز بولسه قنچه بیریش یولاوچی اختیاریگه دیر. یول حقی آشیشی تیل قیمت بولیشیگه باغلیق دیر.»
کابل شهریده هیداوچیلردن ۲۸ یاشلی حاجی احمد، یول حقی هیداوچی و یولاوچی اورتهسیدهگی کیلیشوو گه باغلیقلیگی همده مسئوللر تامانیدن اولر گه انیق نرخنامه بیریلمهگنینی بیلدیرهدی. اونینگ ایتیشیچه: «یولاوچی بیلن کیلیشووگه باغلیق، یول حقی هیچ بیر ناحیه تامانیدن تعیین قیلینمهگن فقط یولاوچی بیلن کیلیشهمیز بو مسئله حقیده هیچ کیم سورهمهگن و نرخ حقیده هیچ نرسه دیمهگنلر.»
شو بیلن بیرگه، ایچکی ایشلر وزیرلیگی ترافیک عمومی ریاستی مسئوللری، کابلده شهر موترلرینینگ یول حقی کنترول ایتیلیشیدن ایشانچ بیلدیرهدیلر.
اوشبو ریاست سوزلاوچیسی حکمتالله سمیر شوندهی دییدی: «ترافیک پولیسی هر کونی قیینچیلیک تاپتیرهدیگن و یولاوچیدن کوپ پول آلهدیگن موترلرنی توختهدی و بو قیینچیلیک حل ایتیلیشی اوچون بوتوغریده سعی-حرکت قیلهیپمیز.»
ترانسپورت و هوا یوللری وزیرلیگینینگ نشرات بوییچه آمری حکمتالله آصفی، افغانستان بویلب موترلرنینگ یول حقینی ترتیب گه سالیش لایحهلر عملگه آشیریلیشی گه تأکید ایتهدی.
شو بیلن بیرگه، یشاوچیلر اوزاق وقتدن بیری ایریم هیداوچیلر تامانیدن تورلی یونهلیشلرده اینیقسه کیچ قورون یا کی یامغیرلی کونلرده یول حقی کوپ آلینیشیدن شکایت قیلهدیلر.
