جمهورلیک ریاست بیرینچی اورین باسری امرالله صالح‌نینگ ایتیشیچه، کابل بیلیم یورتیده‌گی هجومچیلر برماق‌لرینی قول بمبی بیلن پارتلتگن ایکن. اونگه کوره، اولر اوزلریدن هیچ بیر بیلگی قویمه‌سلیک اوچون قول‌لرینی پارتله‌تیب و نابود قیلگن.
صالح جنابلری بوگون (دوشنبه ۱۹- عقرب) فیسبوک صحیفه‌سیده یازیشیچه، کابل بیلیم یورتی و کوثر دانش اوستیده‌گی هجوم و شونینگدیک ریجه‌لنگن قتل‌لر ینه هم تیکشیریله‌دی.
اونینگ ایتیشیچه: «امنیتی کوچلر ترورچیلرگه یقیین‌لشگن بیرحالده، بو ترورچیلری قول‌لرینی پارتله‌تیب هلاک بولگن.»
اونینگ کوپه‌یتیریشیچه، اوشبو هجومچیلر بوندن آلدین هم بیرار جرم گه عیبله‌نیب بایومتریک قیلینگنی ممکن.
اونینگ تاکید قیلیشیچه، مذکور جسدلرنینگ کیم‌لیگی نی بیللی قیلیش اوچون تکنالوژی و چیت‌ایللیک بیرلشیک آرقه‌لی تیکشیروولرنی دوامی بار.
اوتگن دوشنبه کونی کابل بیلیم یورتیده ۳ هجومچی‌نینگ اویوشتریگن هجومی باعث ۲۲ کیشی هلاک و باشقه ۴۰ کیشی یره‌لندی. گرچند بو هجوم مسئولیتی‌نی داعش اوز بوینیگه آلدی، بیراق جمهورلیک ریاست بیرینچی اورین باسری امرالله صالح بو هجوم‌نی طالبان گروهی گه نسبت بیرگن. بیراق بو خبر طالبان گروهی تامانیدن رد بولگن.
جناب صالح نینگ کوپه‌یتیریشیچه، یما سیاووش «آر دی اکس» ماده‌سی آرقه‌لی اولدیریلگن.
اونگه کوره، ایکی کیلولیک پارتلش ماده «سیاووش» مینیلیگن موترنینگ تانکی نی یقیین‌لیگیده جایلشتیریلگن ایکن و شونینگدیک پارتلش ماده نینگ یول گه ییرلشتیریلگنی هم احتمالی بار و بو توغریده تیکشیروولرنینگ دوامی بار. «حاضرگچه بیزنینگ قولیمیزگه بیللی بیر نشانه یوق، بیراق دوحه کیلیشوونامه‌سیدن کیین باشلنگن ریجه‌لنگن هجوملرگه شامل بولیشی ممکن.»
جمهورلیک ریاست بیرینچی اورین باسری نینگ ایتیشیچه، طالبان بویوک هجوم‌لرنی کمه‌یتیریش بیراق ریجه‌لنگن ترورلرنی کوپه‌یتیریش خصوصیده آمریکا بیلن کیلیشگن. اونینگ کوپه‌یتیریشیچه، شو یوزه‌دن پاکستان نینگ وزیرستان منطقه‌سیده «عبیده کاروان» ناملی بیر گروه تعلیم کوریب و کتته شهرلر اینیقسه کابل ده یوباریلگن.
