جمهور رئیس بیرینچی اورین باسری امرالله صالح نینگ ایتیشیچه، اوتگن کونی کابل بیلیم یورتیگه اویوشتیریلگن هجوم، حقانی ترماغی نینگ ایشی دیر و بو حقده داعش گروهی تامانیدن ترقه‌تیلگن اعلامیه ساخته دیر.
جناب صالح فیسبوک صحیفه‌سیده یازیشیچه، هجومچیلرنینگ قوراللی داعش گروهی تامانیدن ترقه‌تیلگن رسملردن فرقی بار، سیما‌لرده فرق بار و هجومچیلرننیگ یانیده طالبان نینگ بیراغی بار ایکن و هجومچیلر هر زمان کبی دیوارنینگ یوزیگه ” یشه‌سین طالبان” دیب یازگن.
جناب صالح‌گه کوره، هجومچیلر حقانی ترماغی نینگ تکتیک‌لریدن استفاده قیلگن، لیکن هجومچیلر نینگ بو هجومی طالبان نینگ ینگی گروهی “فاتح زواک” نینگ هجوم‌لریگه اوخشه‌یدی و “قاتح زواک” گروهی ینگی‌لیکده خوست ولایتیده ایجاد ایتیلگن.
جمهور رئیس بیرینچی اورین باسری گه کوره، قولگه کیلگن اونلرچه سند‌لر، هجومچیلر بیلن طالبان گروهی نینگ علاقه‌سی بارلیگی نی کورسته‌دی.
جناب صالح نینگ ایتیشیچه، داعش، طالبان گروهی نینگ همکارلیگی بولمسدن هجوم اویوشتیریشده قادر ایمس و ترور ریجه‌سی طالبان تامانیدن تیارلنه‌دی.
طالبان گروهی اوشبو هجوم گه قوللری بارلیگی نی رد قیلیب ایتیشیچه، داعش گروهی ننگرهار و جوزجان ولایت‌لریده مغلوب بولگنیدن کیین حکومت تامانیدن توپه‌لنیب و مهمان‌خانه‌لرگه سقلنگندن کیین بونده‌ی هجوم‌لر اوچون استخدام بولگن.
طالبان سوزلاوچیسی ذبیح‌الله مجاهد بیر اعلامیه ترقه‌تیب، اوتگن کونی اویوشتیریلگن هجوم خصوصیده اوشبو گروه نینگ قولی بارلیگی نی شایعه دیگن.
اوتگن کون (دوشنبه ۱۲- عقرب) توشدن آلدین ساعت ۱۱ اطرافیده ۳ هجوم‌چی کابل بیلیم یورتیگه کیریب و حقوق فاکولته‌سی نینگ اوقووچی‌لرینی اوققه توتگن. ترقه‌تیلگن گزارشلرگه کوره، بو هجوم‌ده ۱۹ کیشی هلاک و ۴۰ کیشی یره‌لنگن، لیکن عینی شاهدلر نینگ بیاناتی اساسیده، هلاک و یره‌لنگنلرنینگ رقمی جوده یوقاری دیر.
