اوتگن ۱۰ کون جریانیده طالبان نینگ نفوذلی اعضالری تخار، قندوز، بادغیس و غور ولایت‌لریده هم‌قطارلریدن کمیده ۹ ته‌سینی اولدیریب حربی تجهیزات‌لرینی اوزلری بیلن آلیب کیتگن.
طالبان گروهی سونگی ۶ آی جریانیده بونده‌ی هجوم‌لرینی توخته‌تیب قوییگن ایدی، لیکن سونگی پیت‌لرده قیته باشله‌گن. اوشبو گروهی نینگ نفوذلی بیرعضوی ۲۵ حملده قندوز ۵- امنیتی حوزه‌سی اورین باسرینی باشقه ایکی پولیس بیلن اولدیریب و اوزی حربی تجهیزات و بیرهاموی تانک بیلن طالبان‌گه قوشیلگن.
شونینگدیک، طالبان نینگ نفوذلی بیرعضوی ۲۶ حمل ده تخار ولایتی نینگ دشت‌قلعه تومنیده هم‌قطارلریدن ۳ ته‌سینی اولدیریب پوسته‌گه بولگن حربی تجهیزات‌لرنی اوزی بیلن آلیب کیتگن.
عین‌حالده، حربی و استخباراتی ایش بیلرمان‌لردن بیری محمود حیدری نینگ ایتیشیچه، مملکت کشفی و اسخباراتی نهادلرنینگ ضعفی سبب، طالبان و باشقه تروریستی گروه‌لر قولایلیک بیلن نظام ده ییرلشیب هم‌قطارلرینی اولدیره آله‌دی.
تخار و قندوز چیککه‌سیده غور ولایتیده هم طالبان نینگ نفوذلی عضوی جیم تورمه‌گن. اولردن بیری، بیر میل کلاشینکوف، بیر میل پیکا و بیر راکت بیلن طالبان گروهی‌گه قوشیلگن و شونینگدیک، طالبان نینگ نفوذلی بیرعضوی اوتگن کیچه بادغیس ولایتیده ۳ هم‌قطارینی اولدیریب پوسته‌ده بولگن بوتون حربی تجهیزات بیلن طالبان قطاریگه قوشیلگن.
تخار، قندوز، غور و بادغیس ولایت‌لریده یوز بیرگن واقعه‌لرگه قره‌گنده، طالبان نینگ نفوذلی اعضالرینی هجومی کوپه‌یگن، بیراق ایچکی ایشلر وزیرلیگی رسمی‌لری نینگ ایتیش‌لریچه، بونده‌ی هجوم‌لر کمه‌یگن.
ایچکی ایشلر وزیرلیگی سوزلاوچیسی طارق آرین نینگ ایتیشیچه، جلب‌وجذب‌ده اصلاحات کیلتیریلگنی سبب، طالبان نینگ نفوذلی اعضالری نینگ هجومی کمه‌یگن. اونینگ ایتیشیچه، سابق‌لرده پولیس قطاریده جایلشگن کیشی‌لر بونده‌ی جنایت‌لرگه قول اوره‌دی.
حربی ایش بیلرمان‌لرنینگ ایتیش‌لریچه، قرشی گروه‌لرنینگ نفوذلی اعضالرینی هجوم‌لری و امنیتی کوچلر قطاریگه قنده‌ی جای‌لشیش‌لری هردایم افغانستان حکومتی‌گه قرشی قیین‌چیلیک یره‌تگن.
