بوگون “سه‌شنبه” مملکت‌ده ینگی تعلیمی ییل باشلندی، لیکن جوزجان ولایتی نینگ درزاب تومنیده طالبان گروهی دینی مدرسه‌لرگه فعالیت قیلیش اوچون رخصت بیرمه‌گن.
جوزجان ولایتی بوییچه معارف ریاستی باشلیغی عبدالرحیم سالاری نینگ ینگی تعلیمی ییل باشله‌نیشی اوچون یولگه قوییلگن مراسمده ایتیشیچه، طالبان گروهی اوشبو ولایت نینگ درزاب تومنیده دینی مدرسه‌لردن ۴ ته‌سیگه فعالیت قیلیش اوچون رخصت بیرمه‌گن.
اونینگ ایتیشیچه، مذکور مدرسه‌لر فعالیتی قیته‌دن باشله‌نیشی اوچون سعی و حرکت‌لرنی دوامی بار، لیکن حاضرگه‌قدر نتیجه بیرمه‌گن.
جناب سالاری نینگ کوپه‌یتیریشیچه، بو وضعیت دوام قیلگن صورتده، یوزلرچه اوقووچی تعلیم دن محروم قاله‌دی.
عین‌حالده، جوزجان یشاوچی‌لریدن بیرقطاری نینگ بو وضعیتدن خواطر بیلدیریب ایتیش‌لریچه، طالبان گروهی تورلی بهانه‌لر بیلن تعلیمی مرکزلرنی باغله‌یدی.
جوزجان یشاوچی‌لریدن بیری عزتالله نینگ ایتیشیچه، طالبان گروهی اوشبو ولایت نینگ درزاب تومنیده داعش نینگ قیته‌دن ظهور قیلیشیدن خواطرگه بولگنی سبب، مذکور دینی مدرسه‌لرگه فعالیت قیلیش اوچون رخصت بیرمه‌گن.
جوزجان یشاوچی‌لریدن باشقه بیری حسن نینگ ایتیشیچه، طالبان نینگ بو ایشی اوقووچی‌لرنی تعلیم دن محروم قالیشی‌گه سبب بوله‌دی. او، درزاب تومنیده مذکور دینی مدرسه‌لر فعالیتی قیته‌دن باشله‌نیشی‌نی ایسته‌یدی.
طالبان گروهی حاضرگه‌قدر جوزجان ولایتی بوییچه معارف ریاستی رسمی‌لری نینگ بو ادعاسی خصوصیده فکر بیلدیرمه‌گن.
