آمریکا مدافعه وزیرلیگی نینگ اعلام قیلیشیچه، طالبان دوحه کیلیشوونامه‌سیگه عمل قیلمه‌گن و شو یوزدن آمریکا ینگی دولتی جاری میلادی ییل نینگ می آیی گه قدر بوتون حربی‌لری نینگ چیقاریشی خصوصیده وعده بیرمه‌یدی.
اوتگن کون (پنج‌شنبه ۹- دلو) آمریکا مدافعه وزیرلیگی نینگ سوزلاوچیسی جان کِربی بیرینچی خبری ییغینیده ایتیشیچه، طالبان زوروانلیکلرنی کمه‌یتیریش و القاعده گروهی بیلن علاقه‌لری نینگ کیسیش خصوصیده وعده‌لریگه عمل قیلمه‌گن.
آمریکا مدافعه وزیرلیگی سوزلاوچیسی نینگ کوپه‌یتیریشیچه، طالبان وعده‌لریگه عمل قیلمسدن سیاسی بیر کیلیشووگه قول تاپیش قیین دیر؛ بیراق آمریکا حاضر هم مذکور کیلیشوونامه گه پابند دیر.
جناب کربی گه کوره، افغانستان ده آمریکا حربی‌لری نینگ سانی کمه‌یشی، امنیتی وضعیت گه باغلیق دیر و آمریکا حربی‌لری نینگ بوتونلی چیقاریش خصوصیده بیرلشیک‌لری بیلن مصلحت قیله‌دی.
شونده‌ی بیرحالده، طالبان گروهی سوزلاوچیسی ذبیح‌الله مجاهد، بیر توییت آرقه‌لی بو خبرنی رد قیلگن.
مجاهد گه کوره، طالبان گروهی دوحه کیلیشوونامه‌سیده بیرگن وعده‌لری نینگ هر بیری نی حاضرگچه عملی قیلگن و بوندن کیین هم عملی قیلیشی ممکن.
عین حالده، اوتگن کون شام چاغی آمریکا تشقی ایشلر وزیری آنتونی بلینکن، تینچلیک سوزلشوولری خصوصیده جمهوررئیس محمداشرف غنی بیلن صحبت اوتکزگن.
