ننگرهارده ایریم اریچیلر ییللر داومیده عسل اریلرینی باقیش آرقهلی اوزلری و عایلهلرینینگ درآمدینی تاپیب کیلهیاتگنلرینی ایتهدیلر. اولرنینگ ایتیشیچه، اگر اولر گه کوپراق امکانیتلر، کسبی تعلیم و یخشیراق بازار تاپیلسه، عسل ایشلب چیقریشنی آشیریشلری ممکن.
اریچیلر شونینگدیک، عسل اریلری کسل بولیشی، تعلیمی دستورلرنینگ آزلیگی و محصولاتنی ساتیش اوچون بازار یوقلیگینی، بو بولیمدهگی اساسی قیینچیلیکلردن دیب ایتهدیلر.
کامه تومنی یشاوچیسی بولگن ۲۹ یاشلی نادیه، قریب توقیز ییلدن بیری اریچیلیک بیلن شغللنیب کیلگن و بو ایشنی اوزی همده عایلهسی اوچون بیر درآمد منبع تاپیش مقصدیده باشلهگنینی بیلدیرهدی.
نادیه، بو ایش اوچون دستلب ۳۰۰ دن ۶۰۰ مینگ افغانی مقداریده سرمایه کیریتگن ایدی و ایندی قریب ۲۰۰ته عسل اویهسی بار. اونینگ ایتیشیچه، او ییلیگه قریب اوچ تُن عسل ایشلب چیقرهدی و بو ایشیدن تخمیناً بیر میلیون ۵۰۰ مینگ افغانی درآمد قیلهدی. اونینگ کوپهیتیریشیچه، اوزی یانیده باشقه ۷ کیشی اریچیلیک ایشلریده بند. او شوندهی دییدی: «توقیز ییلدن بیری اریچیلیک بیلن شغللنهمن. مقصدیم اوزیم و باشقهلر اوچون حلال رزق تاپیش همده طبیعی عسل ایشلب چیقریش ایدی. حاضرده تخمیناً ۲۰۰ ته عسل اویهم بار، ییلیگه قریب ۱۵ لک افغانی درآمد آلهمن و ییتی کیشی مین بیلن ایشلهیدی. هر ییلی تخمیناً اوچ تُن عسل ایشلب چیقرهمن.»
۳۲ یاشلی مدینه، کامه تومنیده ینه بیر اریچی. اریچیلیک عیاللر اوچون درآمد تاپیش امکانیتلریدن بیری بولیشی ممکنلیگینی ایتهدی. او شوندهی دییدی: «اریچیلیک عیاللر اوچون یخشی درآمد تاپیش یول دیر. اگر بیز گه تعلیم دستورلری و محصولاتنی ساتیش اوچون بازار بولسه، کوپراق عیاللر بو ساحهده ایشلشی و عایلهلرینینگ اقتصادی وضعیتینی یخشیلشی ممکن.»
مدینه، عسل اریلری کسل بولیشی، تعلیمی دستورلر آزلیگی و بازار قیینچیلیگینی، اریچیلیک ساحهسیده بولگن قیینچیلیکلردن دییدی.
شو بیلن بیرگه، شینوار تومنیدن بولگن ۳۵ یاشلی زاهدالله شینواری، قریب ۱۲ ییلدن بیری اریچیلیک بیلن شغللنیب کیلگنینی بیلدیرهدی. اونینگ کوپهیتیریشیچه، حاضرده ۶۵۰ ته اری اویهسی و عایله اعضالریدن تشقری ینه اوچ کیشی او بیلن ایشلهیدی.
زاهداللهنینگ ایتیشیچه، هر ییلی اونینگ عسل ایشلب چیقریش مقداری فرق قیلهدی و او ییلیگه بیش دن ۱۰ تُن طبیعی عسل ایشلب چیقرهدی. اونگه کوره: «حاضرده ۶۵۰ ته عسل زنبوری صندیغیم بار و عایلهم بیلن بیرگه ینه اوچ کیشی مین بیلن ایشلهیدی. هر ییلی بیش تُندن ۱۰ تُنگچه طبیعی عسل ایشلب چیقرهمن. اریچیلیک فایدهلی تجارت حسابلنهدی. اگر کوپراق قوللب-قوتلنسه و تعلیم دستورلری اوتکزیلسه، ایشلب چیقریش حجمی آشهدی و کوپراق یاشلر اوچون ایش جایلری تاپیلهدی.»
زاهدالله هم، سونگی ییللرده طبیعی عسل گه بولگن طلب آشگنی و اوشبو محصولات بازاری هم اولگیگه قرهگنده یخشیلنگنی حقیده ایتهدی.
شو بیلن بیرگه، اقتصاد شناس سیدنعیم ، ننگرهار مناسب اقلیمی، یم-یشیل باغلری و تورلی خیل اوسیملیکلری بارلیگی سببلی اریچیلیکنی رواجلنتیریش اوچون کتته ظرفیت گه ایگه ایکنینی معلوم قیلهدی.
اونینگ فکریچه، اوشبو ساحه گه سرمایه کیریتیلیب و اریچیلر حمایت ایتیلسه، عایلهلر درآمدی آشیشی و ایش فرصتلری یرهتیلیشیگه یاردم بیرهدی. او شوندهی دییدی: «افغانستانده انییقسه ننگرهارده، عسل ایشلب چیقریش امکانیتی جوده کوپ. اگر بو ساحه گه سرمایه کیریتیلسه و اریچیلر قوللب-قوتلنسه، یوزلب آدملر اوچون ایش امکانیتلری یرهتیلهدی و بو ساحه مملکت اقتصادی ترقیاتیگه مهم رول اوینهشی ممکن.»
شو بیلن بیرگه، ننگرهارده اریچیلر حالتینی ینهده انیقراق اورگنیش مقصدیده اوشبو ولایت زراعت ریاستی، فعال فارملر سانی، عسل اویهلری سانی، هر ییلی عسل ایشلب چیقریش حجمی، اریچیلرنی قوللب-قوتلش درجهسی و ساحهنینگ معمالری حقیده فکرینی آلیشگه حرکت قیلدیک. گزارش اعلان قیلینگونگه قدر مذکور ریاست مسئوللری بو بارهده اوز فکرلرینی بیز بیلن بولیشمهدی.
اریچیلر و بیلرمانلرنینگ ایتیشیچه، ننگرهارده زنبور باقیش امکانیتی یوقاری بولیب، عسل ایشلب چیقریش بیلن بیرقطارده، کوپلب عایلهلر و یاشلر اوچون درآمد همده بندلیک امکانیتلرینی یرهتیشی ممکن. بیراق بو ساحهنی رواجلنتیریش اوچون تعلیم، تخنیکی کمک، بازار گه چیقیش امکانیتی و ولایتدهگی اریچیلیک حالتی بوییچه انیق معلوماتلر ضرور.
