اوتگن کون قندوز ولایتیده «مولوی سکندر» مسجدی گه اویویشتیریلگن هجوم گه قرشی عکس‌العمل‌لر یانیده، ایران تشقی ایشلر وزیرلیگی مذکور هجوم نی قاره‌لدی. اوشبو وزیرلیک افغانستان‌ده یوزبیرگن سونگی هجوم‌لر گه اشاره قیلیب، مذکور مملکت‌ده زوروان‌لیک‌لر نینگ کوپه‌یگنی نی «جدی خواطرلنتیرووچی» دیگن.
ایران تشقی ایشلر وزیرلیگی سوزلاوچیسی سعید خطیب‌زاده، بیر بیانیه ترقه‌تیب ایتگن که، اوشبو هجوم‌لر افغانستان‌ده ایچکی اوروش‌لر نینگ ایجاد قیلیشی خصوصیده ترور‌چیلیک هدف‌لر نی کورسته‌دی.
بیانیه‌ده کیلیشیچه: «اوتگن کونی مزاشریف‌ده شیعه‌لر مسجدی گه اویوشتیریلگن هجوم‌دن کیین، قندوز ولایتیده اهل سنت مسجدی گه هجوم بولدی که تروریست‌لر نینگ افغانستان‌ده ایچکی اوروش باشله‌نیشی اوچون سعی و تلاش قیلیش‌لری نی کورسته‌دی.»
بیزلرنینگ فیسبوک صحیفه‌میزگه باش اورینگ!
افغانستان‌ده بیرلشگن ملت‌لر تشکیلاتی نینگ اورین باسرلیک هیأت دفتری یا یوناما، بو هجوم‌نی قاره‌لب، مذکور هجوم‌لرده کوپراق تینچ اهالی قربان بولگنی نی ایتگن.
بوندن آلدین، مملکت سابق جمهور رئیسی حامد کرزی، اوشبو هجوم نی قاره‌لب، اونی افغانستان یشاوچیلری برابریده بیللی بیر دسیسه دیگن. او نینگ کوپه‌یتیریشیچه، مذکور شوم هدف‌لردن قوتقریش نینگ یالغیز یولی، اهالی نینگ آگاه بولیشی و ملی بیردم‌لیک و بیردم‌لیک نینگ کینگه‌یشی دیر.
شونینگدیک ملی مصالحه عالی کینگشی نینگ سابق رئیسی عبدالله عبدالله، تعلیمی مرکزلر و مسجد‌لرده روزه‌لی و بی‌گناه تینچ اهالی گه قرشی کیین‌مه کیین اویوشتیریلگن هجوم‌لر نی توطئه دیب و ایتگن که «افغانستان نینگ حرمت‌لی ملتی بیلن بیللی دشمن‌لیک‌دن باشقه هیچ قنده‌ی آت بیریش ممکن ایمس.»
عبدالله افغانستان یشاوچیلریدن «شیعه و سنی سینگیل و ایناغه‌لری و مملکت نینگ تورلی قوم‌لری» آره‌سیده بیرلیک نینگ کوپه‌یتیریب و افغانستان دشمن‌لری نینگ دسیسه‌لری گه قرشی هوشیار بیر شکلده رفتار قیلیش‌لری نی سوره‌گن.
بیزلرنینگ توییترده هم تعقیب قیلینگ!
اوتگن کون توش‌دن کیین، ساعت ۲:۳۰ دقیقه اطرافیده قندوزده «مولوی سکندر» مسجدی‌ده پارتلش یوزبیردی. اسلامی امارت سوزلاوچیسی ذبیح‌الله مجاهد، اوشبو پارتلش‌ده، باله‌لر شامل ۳۳ تینچ اهالی نینگ هلاک بولگنی و شونینگدیک ۴۳ کیشی نینگ یره‌لنگنی نی اعلام قیلدی.
اسلامی امارت سوزلاوچیسی اوشبو هجوم نی قاره‌لب و ایتگن که، مذکور واقعه عامل‌لری «عصیان‌چی‌لر» دیر. اونینگ اورغولشیچه، اوشبو واقعه عامل‌لری نینگ قولگه آلینیشی و مجازات بولیشی اوچون جدی سعی و حرکت‌لر نینگ دوامی بار.
بلخ ولایتی مرکزی مزارشریف‌ده «سه دکان» مسجدی گه اویوشتیریلگن هجوم‌دن بیر کون کیین، مولوی سکندر مسجدی‌ده بیر پارتلش یوزبیردی. اوشبو هجوم مسئولیتی نی داعش بوینیگه آلیب و مذکور هجوم‌ده ۱۰۰دن آرتیق کیشی نینگ اولدیرگنی خصوصیده ادعا قیلگن.
