Asset 1SWN

سلام وطندار

افغانستان تانیقلی یازووچیسی رهنورد زریاب عالم‌دن اوتدی

zaryabe

بوگون (جمعه ۲۱- قوس) ایرته‌لب افغانستان تانیقلی یازووچیسی محمداعظم رهنورد زریاب، ۷۶ یاشیده کابل ده عالم‌دن اوتگن. رهنورد زریاب نیچه پیتدن بویان کسل‌لیگی باعث کسلخانه ده بستر ایکن.

جناب زریاب نینگ همکارلریدن بیری لطف‌الله نجفی‌زاده بیر توییت آرقه‌لی اونینگ عالم دن اوتگنی نی تصدیق‌لب ایتیشیچه، رهنورد زریاب اوتگن هفته‌لرده کرونا گه چلینگن ایکن.

او یازووچی‌لیککه علاوه نیچه ییل دن بویان طلوع نیوز تلویزیونی ده ویراستار صفتیده ایشله‌یدی ایکن. محمداعظم رهنورد زریاب فارسی تیلی نینگ تانیقلی و اونملی سیمالریدن بولیب و ایران،‌ تاجیکستان و هند مملکت‌لری نینگ فرهنگی اجتماع‌سی اونینگ اثرلری بیلن تانیش دیر.

رهنورد زریاب قویاش ۱۳۲۳- ییل ده کابل شهری نینگ رکاخانه منطقه‌سیده توغیلگن. جناب زریاب کابل بیلیم یورتی ده ژورنالیزم فاکولته‌سی نینگ بیتتیریب و ماسترلیک سندی نی هم شو رشته گه بریتانیا نینگ جنوبی ویلز بیلیم‌یورتیدن قولگه کیلتیرگن.

رهنورد زریاب دن اونلرچه ادبی اثر قالگن. او یوز دن آرتیق قیسقه داستان و شونینگدیک نیچه رمان یازگن. جناب زریاب مملکت تانیقلی یازووچی‌لریدن باشقه بیری، سپوژمی زریاب نینگ تورموش اورتاغی دیر کیم اولردن ۳ فرزند قالگن.

رهنورد زریاب قویاش ۷۰- دهه ده فرانسه گه مهاجرت قیلدی و طالبان نینگ حکومتی سقوط قیلگندن کیین کابل گه قیتدی.

رهنورد زریاب نینگ عالم دن اوتگنی توغریسیده‌گی عکس‌العمللر

جمهوررئیس غنی و حکومت رسمی‌لریدن قطاری، رهنورد زریاب نینگ عایله‌سی و دوست‌لری بیلن همدردلیک قیلگن.

جمهوررئیس محمداشرف غنی رهنورد زریاب نینگ عالم دن اوتگنی نی فرهنگ و ادب بولیمی اوچون کتته بیر ضایعه دیگن. جناب غنی نینگ ایتیشیچه، استاد رهنورد زریاب عمری نینگ کوپ بولیمی نی یازووچیلیک، رسانه،‌ ادب و فرهنگ بولیمیده اوتکزیب و اوزیدن کوپ اثرلر قویگن.

شونینگدیک ملی مصالحه عالی کینگش باشلیغی عبدالله عبدالله نینگ ایتیشیچه، رهنورد زریاب نینگ عالم دن اوتیشی افغانستان اوچون کتته بیر ضایعه دیر.

مملکت تشقی ایشلر وزیری محمدحنیف اتمر نینگ ایتیشیچه، رهنورد زریاب افغانستان داستانی ادبیاتی نینگ اولگوسی ایکن و ارزشلی اثرلری بیلن اوزی گه کتته ییر بغیشله‌گن.

عین حالده، مملکت سابق جمهوررئیسی حامد کرزی بیر پیام آرقه‌لی مملکت تانیقلی یازووچیسی رهنورد زریاب نینگ عالم‌دن اوتگنی نی کتته ضایعه دیب ایتیشیچه، استاد زریاب عمری نینگ کوپینچه‌سینی افغانستان اصیل ادبیاتی نی کوچلنتیریش اوچون صرف‌لب و اوزیدن اونلرچه ارزشلی اثر قویگن.

مرتبط با این خبر:

شریک قیلینگ:
خبر اوقووچی
تیگیشلی خبرلر و تحلیل‌لر

سلام‌وطندار خبرلری و گزارش‌لری نینگ اجتماعی ترماق‌لردن تعقیب قیلینگ:

توییتر

تلگرام