قندوز ولایتی قلعه‌ی ذال تومنی یشاوچیلریدن قطاری نینگ سلام‌وطندار گه ایتیشلریچه، اولر نیچه دهه‌دن بیری اوشبو تومنده ساغلیق خذمت‌لر رواجلنیشی نی ایسته‌گنلر؛ بیراق اولر نینگ بو ایسته‌کلری عمل گه آشیریلمه‌گن. اولر گه کوره، مذکور تومن کسل‌خانه‌سی ۱۰ یاتاقلی بولگنی سبب، برچه مراجعت قیلووچیلر اوچون ییترلی ایمس. شونینگدیک اولر قلعه‌ی ذال تومنی کسل‌خانه‌سیده ستندرد اوسکونه‌لر یوقلیگیدن شکایت قیلیب ایتیشلریچه، ییل‌لردن بیری کسل‌لری نینگ دوالنیشی اوچون قندوز مرکزی گه انتقال بیره‌دیلر.
قلعه‌ی ذال تومنی یشاوچیلریدن بیری اسد‌الله توفان نینگ ایتیشیچه: «کیچیک بیر کیلینگی‌میز بار که او هم بیزلر اوچون ییترلی ایمس؛ بلکیم ۵-۱۰ یاتاقلی بولسه. مذکور کلینیکده دارو، متخصص شفاکار، همشیره و امبولانس کملیگی بیلن روپه‌ره‌میز. کسل‌لر مراجعت قیلگنی‌ده، کلینیک نینگ کیچیک‌لیگی سبب، کوپینچه کسل گه نوبت ییتیشمه‌یدی؛ چونکه کلینیکده ییترلی جای یوق. امکانیتی هم آز دیر.»
بیزلرنینگ «ایکس» ترماغی ده هم تعقیب قیلینگ!
شونده‌ی بیرحالده، قلعه‌ی ذال تومنی یشاوچیلریدن باشقه بیری امان‌الله رحمانی نینگ ایتیشیچه، کونده قریب ۱۰۰ کیشی اوشبو تومن نینگ کسل‌خانه‌سی گه مراجعت قیله‌دی؛ بیراق ایشلاوچی کملیگی و کسل‌خانه نینگ کیچیک‌لیگی سبب، برچه کسل‌لر قیین‌چیلیگی حل بولمه‌یدی.
امان‌الله نینگ کوپه‌یتیریشیچه: «کسل‌لریمیز نینگ ولایت مرکزی گه انتقال بیریش گه مجبورمیز، چونکه یول نینگ خراب‌لیگی اوچون کوپینچه پیت کسل‌لریمیز تلف بوله‌دی. مجهز کلینیگی‌میز بولگنی‌ده، ولایت مرکزی گه قدر شفاکار اوچون باریش گه نیاز بولمه‌یدی. دولت گه تیگیشلی مسئوللردن کلینیک نینگ رواجلنیشی و متخصص شفاکارلر کیلتیریلیشی نی ایسته‌یمیز.»
باشقه بیر تامان‌دن، قندوز ساغلیق‌نی سقلش ریاستی مسئوللری نینگ ایتیشلریچه، اولر مذکور ولایت تورلی منطقه‌لریده یشاوچیلری نینگ ساغلیق خصوصیده‌گی قیین‌چیلیکلری حلی اوچون سعی و حرکت قیله‌دیلر.
قندوز ساغلیق‌نی سقلش ریاستی اورین‌باسری رحمت‌الله طوطاخیل نینگ سلام‌وطندار گه ایتیشیچه، اوشبو تومنده آلتی ساغلیق مرکز بار و کیچه-کوندوز خذمت ارائه قیله‌‌لر.
بیزلرنینگ فیسبوک صحیفه‌میزگه باش اورینگ!
اونینگ کوپه‌یتیریشیچه: «ان‌شاءالله آق‌تیپه کلینیگی تیزلیککه رواجلنه‌‌دی؛ تشکیلی کوپه‌یه‌دی؛ دارو‌لری کوپه‌یه‌دی؛ ایشلاوچیلری کوپه‌یه‌دی و اهالی قیین‌چیلیگ حل بوله‌دی. نسایی-ولادی شفاکارلریدن بیر جراح کم ایدی و اوتگن هفته تکمیل بولدی.»
ایتیش کیره‌ک که، قلعه‌ی ذال تومنی قندوز نینگ کوپینچه نفوس‌لی تومن‌لریدن بولیب و یشاوچیلری دایم ساغلیق خذمت‌لردن فایده‌لنیش زمینه‌سی کم‌لیگی‌دن شکایت قیله‌دیلر.
