کابل شهری نینگ دولتی کلینیک‌لری گه کسل‌لر مراجعتی میزانی کوپه‌یشی بیلن، اوشبو کلینیک‌لر دارو، مَلکه‌لی شفاکارلر و درمانی امکانیت‌لر کم‌لیگی بیلن روپه‌ره‌لر.
کابل شهری نینگ تایمنی منطقه یشاوچیسی سیماگل، تایمنی کلینیگی گه ایکی یاشر باله‌سی نی درمان اوچون کیلتیرگن دیر. او اوشبو کلینیک‌ده مَلکه‌لی شفاکار و دارو یوقلیگی‌دن شکایت قیلیب ایتیشیچه: «باله‌م یوتله‌دی و ایسیتمه‌سی بار؛ کسل بولگنی اوچون اوشبو کلینیککه کیلدیک، بو ییرده دارو یوق و دارو نی تشقی‌دن آلینگ دیه‌دیلر. پولی‌میز بولگنی پیتده، شخصی کسل‌خانه گه باره‌ر ایدیک. کوپ قیین دیر.»
شونینگدیک پروان سه کلینیگی گه درمان اوچون اوچون کیلگن کابل شهری نوآباد یشاوچیسی لیلا، درمانی امکانیت‌لر گه قول تاپه آلمه‌گنیدن شکایت قیله‌دی. اوشبو عیال نینگ ایتیشیچه: «بو ییرده درست دارو‌سی یوق، نسخه نی بیره‌دیلر و دارو نی تشقری‌دن آلیشی‌میز کیره‌ک. جوده‌یم وضعیتیم یامان، توختیه آلمه‌یمن. دارو یوق، نسخه بیره‌من دارو نی بازار‌دن آل دیدیلر: مینیم کوچیم ییتیشمه‌یدی دیدیم. یالغیز بروفین بیردی؛ بو دارو نی نیمه قیله‌ی.»
بیزلرنینگ فیسبوک صحیفه‌میزگه باش اورینگ!
تایمنی و پروان سوم کلینیگی‌دن هر بیری آلتی بولیم‌ده کسل‌لر گه درمانی خذمت‌لر ارایه قیله‌دیلر. اوشبو ایکی کلینیک مسئوللری نینگ سلام‌وطندار گه ایتیشلریچه، مذکور کلینیک‌لرده جمهوری توزوم گه نسبت، کسل‌لر مراجعتی میزانی کوپه‌یگن و کونده، ۷۰دن آرتیق کسل درمان اوچون بو کسل‌خانه‌لر گه مراجعت قیله‌دیلر.
تایمنی کلینیگی توبرکلوز بولیمی مسئولی فوزیه نینگ ایتیشیچه، اوشبو کلینیک‌ده ایکی آی‌دن بیری کسل‌لر اوچون دارو یوق و شونینگدیک توغروق‌خانه بولیمی، قابله یوقلگی سبب، بیر آی‌دن بیری فعال ایمس دیر. اونینگ کوپه‌یتیریشیچه: «توبرکلوز بولیمی شفاکاری‌مین؛ بیراق شفاکار یوقلیگی سبب، باشقه بولیم‌لرده هم ایشله‌یمن. نرس یوق، مجبورمین، ییر یوق کلینیک نینگ ایکی بولیمی فعال ایمس. کونده حامله عیال‌لر کیله‌دیلر؛ بیراق قابله یوق.»
تایمنی کلینیک مسئوللری نینگ ایتیشلریچه، اوشبو کلینیک کم‌چیلیک‌لری خصوصیده‌گی قیینچیلیکلر نی نیچه مرته کابل ساغلیق‌نی سقلش ریاستی بیلن شریک قیلگنلر؛ بیراق حاضرگچه بو قیین‌چیلیک حل بولمه‌گن.
کابل ساغلیق‌نی سقلش ریاستی، کابل شهری کلینیک‌لریده دارو کم‌لیگی نی قبول قیلیب ایتیشیچه، ساغلیق‌نی سقلش وزیرلیگی تامانیدن دارو ساتیب آلینمه‌سلیگی و شونینگدیک تشقی نهاد‌لر یاردم‌لری نینگ کیسیلیشی سبب، اوشبو کلینیک‌لر دارو کم‌لیگی بیلن، روپه‌ره دیر. کابل ساغلیق‌نی سقلش ریاستی اورین‌باسری عاصم نینگ سلام‌وطندار گه ایتیشیچه: «اوچ ییل‌دن بیری ساغلیق‌نی سقلش وزیرلیگی دارو ساتیب آلمه‌گن، دارو ساغلیق‌نی سقلش وزیرلیگی تامانیدن بیریلگنی‌دن کیین ترقه‌تیله‌دی و ریاست بوییچه، نیچه مرته تشقی نهاد‌لردن یاردم ایسته‌گن‌میز، بیر ایکی مرته یاردم بیردیلر؛ بیراق یاردم‌لر ییترلی ایمس و دارو کم‌لیگی قیین‌چیلیگی نی حل قیلمه‌یدی.»
کسل‌لر یالغیز تایمنی و پروان سه کلینیک‌لریده درمان خذمت‌لردن فایده‌لنه آلمه‌سلیک‌دن شکایت قیلمه‌یدیلر؛ بیراق کابل شهری‌ده دولتی اینگ بویوک کلینیک‌لردن مرکزی پولی‌کلینیک‌ده هم، عینی وضعیت بیلن روپه‌ره‌لر.
مرکزی پولی‌کلینیککه جیی نی درمان اوچون کیلتیرگن پکتیا یشاوچیسی محمد نبی، اوشبو کلینیک‌ده مَلکه‌لی شفاکارلر یوقلیگی و کسل‌لر گه توجه‌سیزلیک‌دن شکایت قیله‌دی. «کسل نی درست معاینه قیلمه‌یدیلر؛ چونکه کوپ گوجوملی دیر، پکتی ده امکانیت یوق، بو ییرگه کیلدیم و بو ییرگه هم ناامید بولدیم.»
بیزلرنینگ توییترده هم تعقیب قیلینگ!
مرکزی پولیکلینیک، ۲۰۰ ساغلیق‌نی سقلش ایشلاوچیسی و ۲۶ درمانی بولیمی بار که، نیچه بولیمی اوتگن ۲ ییل‌ده ایجاد بولگن. اوشبو کلینیک نینگ داخله و تیش بولیمی‌ده مراجعت قیلووچیلر سانی کوپ و کونده‌ی مذکور ایکی بولیم گه قریب ۷۰ کسل مراجعت قیله‌دی. عین حالده، اوشبو کلینیک بیر قطار بولیم‌لرده مَلکه‌لی ایشلاوچیسی و شفاکارلیک اوسکونه‌لر کم‌لیگی بیلن روپه‌ره دیر.
مرکزی پولی‌کلینیک‌ده کسل‌‌دارلردن باشقه بیری زرمینه نینگ ایتیشیچه: «قیزیم کسل دیر، درمان اوچون کیلگن‌میز؛ بیراق بو ییرده درست توجه قیلمه‌یدیلر؛ معاینه درست ایمس. بو ییر گه درمان اوچون کیلیش گه مجبور‌میز. گرچند اوزیمیز مصرف قیله‌میز، یالغیز معاینه رایگان دیر. بیر قطار معاینه‌لر نی تشقی‌ده انجام بیره‌میز.»
عین حالده، مرکزی پولیکلینیک رئیسی دین‌محمد حبیبی نینگ سلام‌وطندار گه ایتیشیچه، اوشبو کلینیک قیینچیلیکلر حلی اوچون یاردم بیرووچی نهاد‌لر قوللب-قوتلشی گه نیازی بار. انه شوو سبب، مَلکه‌لی شفاکارلر و ساغلیق‌نی سقلش اوسکونه‌لر نینگ یره‌تیلیشی اوچون، بیر قطار بولیم‌لرده یاردم بیرووچی نهاد‌لر نینگ مالی حمایتی گه نیاز بار. اونینگ کوپه‌یتیریشیچه: «التراسوند بولیمی‌ده، آز پول بیلن ایشلمه‌یدیلر یا-ده دیجیتل اکسری ده وسیله‌لریمیز آز دیر و تیارلنیشی گه نیاز بار. ایکو بولیمی‌ده متخصص گه نیازیمیز بار، بیر تامان‌دن شفاکارلر آیلیگی آز دیر؛ بیراق ینه هم ایشله‌یدیلر.»
مرکزی پولی کلینیک رئیسی گه کوره، جمهوریت توزومی‌ده‌گی مراجعت قیلووچی میزانی ۳۰۰کسل‌دن، بیر مینگ ۵۰۰ کسل گه ییتیشگن دیر.
کابل ساغلیق‌نی سقلش ریاستی نینگ آماری اساسیده، کابل بویلب ۵۲ کلینیک نینگ فعالیتی بار و یشاوچیلر گه تورلیم بولیم‌لرده ساغیلق‌نی سقلش خذمت‌لر نی ارایه قیله‌دی.
افغانستان ساغلیق‌نی سقلش سکتوری، کوپراق دنیا یاردم‌لری گه تیگیشلی دیر و انه‌شوو سبب، بو بولیم‌ده دنیا یاردم‌لری نینگ کمه‌یشی بیلن، شونینگدیک قیین‌چیلیک‌لری کوپه‌یب و نتیجه‌ده، یشاوچیلر نینگ کیفیت‌لی و نیازلری بولگن ساغیلق‌نی سقلش خذمت‌لر گه قول تاپیشلری نی قیین‌چیلیک بیلن روپه‌ره قیله‌دی.
