کابل یشاوچیلریدن قطاری، هوا افلاسلیگی کوپهیگنیدن خواطر بیلدیریب ایتیشلریچه، هوا افلاسلیگی آلدی آلینمهگنی صورتده کوپینچه کسللیکلر گه سبب بولهدی.
کابل شهریده قول اوستیده سودا ساتهدیگنلردن رفیعالله امینی، هوا افلاسلیگیدن نالیب ایتیشیچه، دایم تشقریده ایشلشی طفیلی کسل بولگن دیر.
شونینگدی کابل یشاوچیلریدن بیری وحیدالله نینگ ایتیشیچه، هوا افلاسلیگی آلدی آلینمهگن صورتده، حتا نفس آلیش نینگ قیین بولیشی ممکن.
بیزلرنینگ فیسبوک صحیفهمیزگه باش اورینگ!
کابل یشاوچیلری تیگیشلی ادارهلر مسئوللریدن هوا افلاسلیگی نینگ کنترول بولیشی نی ایستهگنلر. مذکور شهر نینگ ایکینچی ناحیه یشاوچیسی بولمیش جمشید نینگ ایتیشیچه: «مسئوللردن فلترلر نینگ کنترول قیلیشلری نی ایستهیمیز. تاش کومیر قوللنیلهدیگن اپارتمانلر نینگ فلترلری تیکشیریلیشی کیرهک.»
شوندهی بیرحالده، اطراف-محیط بوییچه ایش بیلرمانلردن قطاری، کابل شهریده جمعیت کوپهیگنی، صنعتی پارکلر فعالیتی، قوروقچیلیک، تاش کومیر و باشقه دود قیلهدیگن نرسهلردن یشاوچیلر نینگ قوللنیشی، هوا افلاسلیگی نینگ اصلی عامللری بیلهدی.
اطراف-محیط بوییچه ایش بیلرمانی عبدالهادی اچکزی، اهالیدن هوا افلاسلیگی کمهیشی خصوصیده سهم آلیب و شونینگدیک سرپرست حکومتدن هوا افلاسلیگی گه سبب بولهدیگن کیشیلر بیلن قانونی یاندهشیلیشی نی ایستهگن. «حکومت اوز فایدهسی گه، اپارتمانلر، ایشخانهلر و صنعتی پارکلر گه جریمه وضع قیلهدی.»
عین حالده، اطراف-محیط نی سقلش ملی ادارهسی مسئوللری نینگ ایتیشلریچه، اوتگن ایکی آی گه قرهگنده هوا افلاسلیگی کوپهیگن دیر.
اطراف-محیط نی سقلش ملی ادارهسیده هوا افلاسلیکلری آلدی نی آلیش و تیکشیرش بوییچه مسئولی بصیر امین نینگ ایتیشیچه، اوشبو اداره باشقه نهادلر همکارلیگی بیلن، هوا افلاسلیگی آلدی آلینیشی خصوصیده سعی و حرکت قیلهدی.
جناب بصیر نینگ کوپهیتیریشیچه: «شمال بولمهگن کونلر، ۳۰۰ مایکروگرامگچه هم هوا افلاسلیگی ثبت بولگن که، افغانستان ده نورمال درجهده هوا نینگ کیفیت ستندردی ۱۵۰ مایکروگرام تعیینلنگن و کابل شهری نینگ تورلی بولیملریده سیار تیملریمیز نی ییرلشتیریش بیلن هوا افلاسلیگی آلدی آلینیشی اوچون سعی و حرکت قیلهمیز.»
بیزلرنینگ «ایکس» ترماغی ده هم تعقیب قیلینگ!
بولر گه علاوه، کابل شهری انتانی کسلخانه مسئوللری نینگ ایتیشلریچه، هوا افلاسلیگی یوقمه کسللیکلر ترقهلیشی نینگ کوپهیتیرهدی.
کابل شهری انتانی کسلخانهسیدهگی شفاکارلردن فریدالله عمری، کسللیکلر آلدی آلینیشی اوچون ایتیشیچه: «اویدن چیقگنیمیز پیتده، ماسک تاقیشیمیز کیرهک. تنفسی کسللیکلر گه چلینگن کیشیلر اویده هم ماسک تاقیشلری و اوز نرسهلری نی باشقهلردن جدا قیلیشلری کیرهک.»
ایتیش کیرهک که، بوندن آلدین هم کابل شهریده هوا افلاسلیگی خصوصیده تورلیخیل گزارشلر ترقهلگن ایدی و مملکت پایتختی، دنیا نینگ اینگ افلاسلنگن پایتختلردن بیری دییلگن.