اوتگن ییل ۲۸- حوت مسکو افغانستان تینچلیگی توغریسیده بیر ییغین گه میزبان ایدی. مذکور ییغین افغانستان حکومت نماینده‌لری، طالبان هیأتی، آمریکا نماینده‌لری، بیرلشگن ملتلر تشکیلاتی و روسیه حضوری بیلن یولگه قوییلدی و بو ییغینده تینچلیک پروسه‌سی تیزلشتیریلیشی اوستیگه بحث قیلیندی.
بوگون (یکشنبه ۱۵- حمل) افغانستن ملی کنگره حزبی باشلیغی عبدالطیف پدرام کابل ده خبری بیر ییغین اوتکزیب ایتیشیچه، گرچند جناب عبدالله دولت هیأتی باشلیغی بولگنی فکر قیلینه‌دی ایدی، بیراق بونده‌ی ایمس ایکن و بو هیأت باشلیغی باشقه بیر کیشی ایکن.
افغانستان ملی کنگره حزب باشلیغی گه کوره، جناب عبدالله افغانستان توغریسیده مسکو گه یولگه قوییلگن اونملی ییغین‌لرده موجود ایمس ایکن و بو جلسه‌لر یاپیق دروازه‌لر آرقه‌سیده و مملکت باشقه سیاستچی‌لری نینگ حضوری بیلن صورت تاپگن.
جناب پدرام نینگ ایتیشیچه، دوحه‌ده افغانستان مذاکره‌چی هیأت باشلیغی معصوم استانکزی، عبدالله اورنیده دولت هیأتی نینگ ریاستی نی عهده‌دار ایکن و او اونملی موضوعلر حقیده قرار آله‌دی ایکن.
جناب پدرام نینگ بیاناتی توغریسیده مصالحه عالی کینگش نینگ فکرینی آلیش ایسته‌دیک؛ بیراق مصالحه عالی کینگشی سوزلاوچیسی فریدون خوزون، بو توغریده سوزلش گه حاضر بولمه‌گن.
