لوگر ولایتیدن امنیتی بیر منبع نینگ کیم‌لیگی سیرقالیش‌نی ایسته‌ب سلام‌وطندارگه ایتیشیچه، بوگون “چهارشنبه” ایرته‌لب ساعت ۴ ده اوشبو ولایت نینگ بره‌کی برک تومنی‌نی «لب جر» منطقه‌سیده جایلشگن امنیتی بیر پوسته طالبان قولیگه سقوط قیلیب و مذکور پوسته‌ده بولگن دولتی کوچلر بوتون حربی تجهیزات‌لری بیلن طالبان گروهی‌گه قوشیلگن.
منبع نینگ کوپه‌یتیریشیچه، طالبان جنگریلری اوتگن کیچه اوشبو ولایت نینگ محمدآغه تومنیده بیرقطار امنیتی پوسته‌لر اوستیگه هجوم قیلگن و آتیشمه عاقبتیده، طالبان جنگری و امنیتی کوچلرگه تلفات ییتیشگن.
بیراق، لوگر پولیس قومندانلیگی سوزلاوچیسی گل‌حیدر احمدی نینگ لب جر پوسته‌سی طالبان قولیگه سقوط قیلگنی‌نی رد قیلیب سلام‌وطندارگه ایتیشیچه، اوشبوامنیتی پوسته باشقه منطقه‌ده انتقال بیریلگن.
عین‌حالده، بغلان ولایتیدن امنیتی بیر منبع نینگ کیم‌لیگی سیرقالیش‌نی ایسته‌ب سلام‌وطندارگه ایتیشیچه، طالبان جنگریلری اوتگن کیچه اوشبو ولایت نینگ گذرگاه نور تومنیده امنیتی بیر پوسته اوستیگه هجوم قیلگن نتیجه‌ده امنیتی کوچلردن ۸ ته‌سی هلاک و باشقه ۶ یره‌لنگن.
۲۱۷ پامیر قول اردو قومندانی عباس توکلی نینگ سلام‌وطندارگه ایتیشیچه، مذکور آتیشمه‌ده طالبان تامانیدن نام‌لنگن ولسوال شامل ۶ طالب هلاک و باشقه ۷ طالب یره‌لنگن. جناب توکلی نینگ کوپه‌یتیریشیچه، کمکی کوچلر محلگه بارگنیدن سونگ، طالبان جنگریلری ساحهدن قاچیب کیتگن و بیرقطار حربی تجهیزات امنیتی کوچلر قولیگه توشگن.
۲۱۷ پامیر قول اردو قومندانی، مذکور آتیشمه‌ده امنیتی کوچلرگه زیان ییتیشگنی‌نی تصدیق‌لگن، لیکن بیللی رقم ارایه قیلمه‌گن.
طالبان گروهی حاضرگه‌قدر اوشبو ایکی واقعه خصوصیده فکر بیلدیرمه‌گن.