افغانستان ده اسلام امیرلیگی نینگ قیته قدرت گه ایریشگنی بیلن، اوشبو حکومت آرقه‌لی مملکت بویلب مخدره ماده ایکیلیشی تقیق‌لندی؛ بیراق ینه هم بیر قطار بولیم‌لر یشاوچیلری یاشیرینچ شکلده یوزلب جریب ییر گه کوکنار ایککنلر.
معلومات‌لر اساسیده، لغمان ولایتی نینگ بیر قطار تومن‌لریده ایکینچیلردن قطاری آرقه‌لی یاشیرینچ شکلده مخدره ماده ایکیلگنی بیرحالده، مذکور ولایت محلی مسئوللری مخدره ماده ایکیلیشی و اونینگ ایشلب چیقریلیشی آلدی آلینیشی خصوصیده ایشانچ بیرگنلر.
لغمان ولایتی امنیه قوماندانلیگی نینگ مخدره ماده گه قرشی کوره‌ش مدیری قاری ادریس نینگ ایتیشیچه، حاضر ایسه مخدره ماده ایکیلیشی تقیق‌لنگن و بو ایش گه قول اورگن کیشی نینگ ایکین‌زارلری نابود بولیب و اوزی هم مسئوللر آٰرقه‌لی قولگه آلینیشی ممکن.
بیزلرنینگ فیسبوک صحیفه‌میزگه باش اورینگ!
لغمان ولایتی مخدره ماده گه قرشی کوره‌ش مدیری نینگ کوپه‌یتیریشیچه: «مرکزدن کیلگن هیئت و بیزلر آرقه‌لی کوکنار ایکیلیشی گه قرشی کوره‌ش کمپاین، الینگار و الیشینگ تومن‌لریده دوامی بار، حاضرگچه کوکنار ایکیلگن ۴۱ جریب و ۱۰ بسوه ییر اورته‌دن کیتکزیلگن و شونینگدیک یوزلب جریب ییر هم اهالی آرقه‌لی اورته‌دن کیتکزیلگن. بو توغریده اهالی آگاهی‌لیگی اوچون هم بیر پروسه نی یولگه قویگن‌میز.»
شونده‌ی بیرحالده، لغمان ایکینچیلریدن قطاری بو ولایت‌ده کوکنار ایکیلیشی سببی نی، اقتصادی قیین‌چیلیک و ایش زمینه‌سی یوقلیگی عنوان قیلگنلر.
اولر گه کوره، باشقه ایکینلر گه قره‌گنده کوکنار ایکینی، اولر نینگ اقتصادی قیین‌چیلیکلری حلی خصوصیده یاردم بیره‌دی.
بو توغریده لغمان یشاوچیلریدن احمد نینگ ایتیشیچه: «یخشی درآمدی بولگنی و آز سوو گه نیاز بولگنی اوچون کوکنار ایکه‌میز. بو ییل قوروق‌چیلیک ایدی و سووغاریش اوچون سوو کم. انه شوو سبب، کوکنار ایکیش گه یوز کیلتیردیک.»
شونینگدیک اوشبو ولایت یشاوچیلریدن باشقه بیری تاج محمد نینگ ایتیشیچه: «اهالی نینگ اقتصادی وضعیتی یخشی ایمس و ایش یوق. مملکت‌دن تشقی گه کیتیش اوچون هم یول‌لر یاپیق. باشقه ایکینلر هم یخشی درآمدی یوق. کوکنار ایکینی ناروا بولگنی نی بیله‌میز، بیراق باشقه چاره‌میز یوق.»
مذکور ایکینچیلر نینگ ایتیشلریچه، باشقه ایکینلر گه یوز کیلتیرگنلری صورت‌ده، حتا عایله خره‌جتلرینی هم تأمین قیله آلمه‌یدیلر.
بیزلرنینگ «ایکس» ترماغی ده هم تعقیب قیلینگ!
عین حالده، ایکینچیلیک بوییچه ایش بیلرمان‌لردن قطاری کوکنار ایکیلیشی آلدی آلینیشی خصوصیده اسلام امیرلیگی نینگ اقدامی‌دن خورسند‌لیک بیلدیریب بیراق تاکید قیلیشلریچه، ایکینچیلر بیلن بدیل ایکین توغریسیده همکارلیک صورت تاپیشی کیره‌ک.
بو توغریده ایکینچیلیک بوییچه ایش بیرمانی عوض‌خان شیرزاد نینگ ایتیشیچه: «کوکنار ایکیلیشی تقیق‌لنگنی یخشی بیر اقدام دیر، بیراق بدیل ایکین بیریلیشی، اهالی گه معلومات بیریش اینیقسه اولر نینگ محصوللری گه ماس بازار تاپیش بولیمی‌ده ایکینچیلر بیلن یاردم صورت تاپیشی کیره‌ک. بو رقم بولگنی‌ده فکرمچه هیچ کیم کوکنار ایکمس.»
ایتیش کیره‌ک که، بوندن آلدین ایچکی ایشلر وزیرلیگی نینگ مخدره ماده گه قرشی کوره‌ش اورین‌باسرلیک مسئوللری سلام‌وطندار گه، اوتگن ایکی ییل‌ده ۱۵ مینگ ۳۰۰ هکتاردن آرتیق ییر نینگ کوکناردن تازه‌لنگنی نی اَیتگن ایدیلر.
