چیچنستان جمهوریتی رهبری رمضان قدیروف، اوکراین گه قورال-یراغ ییتکزیب بیرهیاتگن و تورلیچه قوللب-قوتلهیاتگن دولتلر گه حربی یول بیلن جواب قیتریش کیرهک دیب ایتدی.
رمضان قدیروف، اوشبو سوزلرنی بوگون (۲۷ سرطان/۱۸ جولای، شنبه) تلگرام کانالیده یازگن.
اونینگ سوزلریگه کوره، پیاده عسکرلر مملکت جمهور باشلیغی ولادیمیر پوتیننینگ بویروغی بیلن انیقلنگن یونهلیشده حرکتلنیشگه تیار.
چیچنستان رهبری، «ناتو» آرتیگه یشیرینیب، هیچ قندهی تارتینمسدن، آچیقچسیگه و ایککیلنمسدن اوکراین گه قورال، معلوماتلر و باشقه توردهگی یاردملرنی کورستهیاتگن دولتلردن باشلش ضرر قیلمسلیگینی بیلدیرگن.
او شوندهی دیب یازگن: «اگر اولرنینگ اوزلری روسیه صادر بولهیاتگن واقعهلرنی صبر بیلن و قول قاووشتیریب کوزهتیب تورمسلیگینی هیچ توشونه آلیشمهیاتگن بولسه، دیمک بونی اولرگه شونچه کی ساده، توشونرلی تیلده ایتیب بیریش وقتی کیلدی. پارتلاوچی ماده هیدینی سیزیشلری بیلن، کلاشینکوف آوازی و تی-۹۰ تانکلرینینگ تقیللشینی ایشیتیشلری بیلن همه نرسهنی دراو توشونیب ییتهدیلر و حقیقت گه قیتهدیلر. اوت آچیش وقتی کیلدی، والسلام.»
روسیه حاضرگی وقتده تینچ اهالی آرهسیده اینگ کم تلفاتلر بیلن احتیاطکار جنگوار حرکتلر آلیب بارهیاتگنینی قوشیمچه قیلگن، رمضان قدیروف.
روسیه و اوکراین اورتهسیدهگی اوروش میلادی ۲۰۲۲-ییلی فبروری آییده باشلندی و ایندی بیشینچی ییلگه کیرگن. ایکی تامان اورتهسیده صلح کیلیشووی اوچون خلقارا برچه سعی-حرکتلر حاضرگچه نتیجه بیرمهگن.
