ساغلیک وزیرلیگی نینگ اعلام قیلیشیچه، هندوستان افغانستان گه ۵۰۰ مینگ دوز کرونا واکسینی یاردم بیریش گه وعده بیرگن. مذکور وزیرلیککه کوره، بو مقدار بیلن کمیده ۲۵۰ مینگ کیشی نینگ واکسین قیلینیشی گه قرار قیلینگن.
مذکور وزیرلیک بوگون (دوشنبه ۶- دلو) بو وزیرلیک پلان و پالیسی معینی بشیر نورمل، دنیا ساغلیک تشکیلاتی و یونیسف نماینده‌لری نینگ حضوری بیلن هند تامانیدن یاردم بیریله‌دیگن واکسین نینگ قنده‌ی تطبیق ایتیلیشی خصوصیده بیر ییغین اوتکزدی.
ساغلیک وزیرلیگی هندوستان تامانیدن یاردم بیریله‌دیگن واکسین قچان افغانستان گه کیلیشی نی بیللی قیلمه‌گن.
بوندن آلدین ساغلیک وزیرلیگی ۲۱- جدی آیی‌ده افغانستان باشقه ۶ آی گچه کرونا واکسینی گه قول تاپیشی نی اعلام قیلگن ایدی. مذکور واکسین دنیا بانکی و آسیا نی رواج‌لنتیریش بانکی نینگ حمایتی بیلن افغانستان اوچون تیارلنه‌دی.
شونده‌ی بیرحالده، اوتگن ۲۴ ساعت ده مملکتده کرونا گه چلینگن ۴ کسل جان بیرگن.
ساغلیک وزیرلیگی نینگ اعلام قیلیشیچه، اوتگن ۲۴ ساعت ده کرونا ویروس گه شبهه‌لی ۱ مینگ و ۹۹۱ واقعه تیکشیریلگن، کیم بولردن ۷۸ ته‌سی ایجابی انیق‌لنگن.
ساغلیک وزیرلیگی نینگ گزارشی گه کوره، اوتگن بیر کیچه‌وکوندوز ده کرونا گه چلینگن ۴ کسل جان بیرگن و شونینگدیک ۶۷ کسل دارولنگن.
ساغلیک وزیرلیگی نینگ معلوماتی اساسیده، مملکتده حاضرگچه ۵۴ مینگ و ۷۵۰ کیشی کرونا ویروس گه چلینگن، کیم بولردن ۲ مینگ و ۳۹۰ ته‌سی جان بیرگن و باشقه ۴۷ مینگ ۳۶۵ ته‌سی ایسه قیته دارولنگن.
ساغلیک وزیرلیگی گه کوره، مملکتده حاضرگچه کرونا ویروس گه شبهه‌لی ۲۴۰ مینگ و ۷۶۹ واقعه تیکشیریلگن.
دنیا ده حاضرگه‌قدر ۹۹ میلیون و ۷۸۴ مینگ دن آرتیق کیشی کروناگه چلینگن کیم بولردن ۲ میلیون و ۱۳۹ مینگ دن آرتیغی جان بیرگن و ۷۱ میلیون و ۷۷۸ مینگ دن آرتیغی ایسه دارولنگن.
کرونا ویروسی نینگ کوپینچه ایجابی واقعه‌لری آمریکا، هند، برزیل، انگلستان و روسیه مملکت‌لریده قید ایتیلگن.
