دایکندی ده نسایی-ولادی شفاکارلرینینگ آگاهلنتیریشیچه، حاملهدارلیکده آنهنینگ تنه سووی کملیگی جنینگه قان جریانی و اکسیژن انتقال تاپیشینی کمهیتیریب و چقهلاق توشیشی، وقتدن آلدین دنیا گه کیلیشی، جنین رشدی کمهیشی، قبضیت و فشار پس توشیشی خوفینی کوپهیتیرهدی.
اولرنینگ اورغولشیچه، حاملهدارلیکده ییترلیچه سوو ایچیش نهفقط آنه ساغلیگی، بلکیم جنین رشدی اوچون هم مهم دیر.
مذکور آگاهلنتیریشلر بولگنی بیرحالده، دایکندی دهی حاملهدار عیاللر آگاهیسیزلیک و ایچیملیک سوودن آزراق فایدهلنهلنیش سبب، ییترلیچه سوو ایچمهیدیلر. آلتی آیلیک حاملهدار بولگن ۲۱ یاشر حبیبهنینگ ایتیشیچه: «حاضر آلتی آیلیک حاملهدارمین. اوی ایشلری و درس سبب، منظم شکلده سوو ایچه آلمهیمن. کونده قریب اوچ یا-ده تورت گیلاس سوو ایچهمن. بعضی کونلر جنین قیمیردهشی کمهیهدی و اوزیم ضعف و سووس قالگنیمنی حس قیلهمن. شفاکار هر کونی ۱۰ گیلاس سوو ایچیشیم نی ایتگن، لیکن فرصت قیله آلمهیمن.»
شونینگدیک سکیز آیلیک حاملهدار بولگن ۳۸ یاشر کبرا صالحینینگ ایتیشیچه: «اونچهلیک جدی آلمس ایدیم و هر قچان سووس قالگنیمده سوو ایچهر ایدیم. کونده بلکیم ایکی یا-ده اوچ گیلاس سوو ایچیدیم. بعضاً چقهلاقنینگ حرکتی کمهیهدی و بیران قیینچیلیک چیققن بولمهسین دیب قورقهمن. دایم سووس و ضعف قیلیشنی حس قیلهمن. شفاکار کوپراق سوو ایچیشیمنی ایستهدی، بیراق اوی ایشلری کوپ و اونیتهمن.»
اوشبو توجهسیزلیک بعضا ایسه آلدی آلینمهیدیگن عاقبتلرگه سبب بولهدی. عیاللردن قطاری حاملهدارلیک سونگی آیلریده جنین سویوقلیگینینگ جدی شکلده کمهیگنینی بیلیب، سزارین یا-ده اوزون مدت بستری بولیشدن باشقه چارهلری قالمهیدی.
جنین سووی کملیگی سبب سزارین قیلدیریشگه مجبور بولگن ۲۳ یاشر فاطمهنینگ ایتیشیچه: «حاملهدارلیکنینگ ییتینچی آیلیگیده چقهلاغیم سوو کملیگی بیلن روپهره بولگنینی بیلدیم، چونکه قیمیردهشی کمهیگن ایدی. مین یالغیز سووس قالگنیمده سوو ایچیب و کوپراق قاره چای ایچهر ایدیم. شفاکار کونده کوپینچه سوو ایچیب و جوده قوییق چای ایچمسلیگیمنی ایتگن ایدی. چقهلاقنینگ ضعیفلیگی اوچون سزارین قیلیشگه مجبور بولدیم. کاش وقتراق بیلسه ایدیم که سوو اورینده چاینینگ ضرری بار.»
دایکندی ولایتی نیلی تومنیدهگی ۲۵ یاشر فائزه محمدحسیننینگ ایتیشیچه: «حاملهدارلیک آلتینچی آییده بالهمنینگ حرکتی یوقلیگینی بیلدیم. تیریک بولمهگنینی توشینهر ایدیم. اوزیم جودهیم ضعیف ایدیم، باشیم ایلنهر ایدی و لبلریم قوریدی. شفاکار تنهم سووی کملیگی و کونده ۷ دن ۸ گیلاس سوو ایچیشیمنی ایتدی. حتا بیر هفته کسلخانهده هم بستر ایدیم و شفاکارلر بو وضعیتنینگ آنه و جنین اوچون تهدید قیله آلینیشینی ایتدیلر. حاضر هر کونی سوو ایچیشگه سعی و حرکت قیلگنیم بیلن بیراق ینه هم بعضا اونیتمهمن.»
دایکندیدهگی عیاللر، قشاقلیک، ایچیملیک سوودن آزراق فایدهلنیش، ساغلیقنی سقلش مرکزلریدن اوزاقلیک، کوندهلیک مصروفیتلر و عایلهلرنینگ توجهسیزلیگی سبب، جبرلنیش وضعیتیگه قرار تاپگنلر که بو، اوزلری همده جنینلرینینگ سلامتلیگینی خوف آستیگه قویه آلهدی.
نسایی ولادی متخصصی راضیه احمدی، حاملهدار آنهلرده سوو کملیگی خوفلری و سوو فایدهلری حقیده شوندهی دیدی: «سوو تنه اوچون مهم بیر منبع بولیب و حاملهدارلیک دورهسیده اونینگ اهمیتی کوپراق بولهدی، چونکه هم آنه همده جنیننینگ نیازی بار. سوو ییترلی بولمهگنی صورتده، قان جریانی و جنین گه اکسیژن انتقال تاپیشی کمهیب و اونینگ طبیعی رشدینی قیینلشتیرهدی. حاملهدار عیاللر باش اوچ آیده ۸ دن ۹ گیلاس سوو، ایکینچی اوچ آیده ۹ دن ۱۰ گیلاس سوو و اوچینچی اوچ آیده ایسه ۱۰ دن ۱۲ گیلاس سوو ایچیشلری کیرهک.»
نسایی ولادی شفاکارلریدن باشقه بیری عاقله محمدی، جنین اوچون آنه تنهسیده سوو کملیگی طفیلی خوفلرگه اشاره قیلیب و ایتیشیچه: «حاملهدار عیاللر اوچون سوو جودهیم مهم دیر. سوو کملیگی آنه ضعفی، چقهلاقنینگ توشیشی و جنین رشدیده قیینچیلیک کوپهیشیگه سبب بولهدی. عیاللر کونده ۸ گیلاس سوو ایچیشلری و سونگی آیلرده بو مقدارنینگ کوپهیتیریشلری کیرهک. شونینگدیک حاملهدار عیاللرنینگ تنهسی سووی کملیگی، امنیوتیک سویوقلیگی کمهیشی و جدی موردلرده جنین توشیشی یا-ده وقتدن آلدین دنیا گه کیلیشیگه سبب بوله آلهدی.»
سوو اورنیده چای ایچیش عادتی، سووس قالمسدن سوو ایچمسلیک و حاملهدارلیکنینگ تورلی آیلریده نیازلری بولگن سوو مقدارینی بیلمسلیک، بو قیینچیلیکنینگ اصلی عامللریدن دیر.
