کابل شهری‌ده عیال‌لردن قطاری نینگ ایتیشلریچه، عیاللر یوزی گه پارک‌لر ایشیگی یاپیلیشی بیلن، اولر اوز ساغلیک‌لری اوچون پارک‌دن تشقری‌ده سپورت قیلیش گه مجبور بولگنلر.
کابل شهری کارته‌ی‌نو منطقه‌سی یشاوچیسی خدیجه نینگ ایتیشیچه، بوندن آلدین وزنی نینگ کوپلیگی اوچون پارک‌لر گه باریب سپورت قیله‌ر ایکن، بیراق حاضر ایسه پارک‌لر نینگ دیواری آرقه‌سیده و سرک‌لرده سپورت قیلیش گه مجبور بولگن.
اونینگ کوپه‌یتیریشیچه: «اوتمیش‌لرده پارک گه سپورت قیلیش اوچون بارر ایدیک. داکتر وزن‌لرینگیز نی کمه‌یتیریش اوچون سپورت قیلینگ دیگن ایدی. اسلام امیر‌لیگی حاکمیتیدن کیین سرک‌لرده سپورت قیله‌یپمیز. اسلام امیر‌لیگی دن عیاللر نینگ راحت بیر شکلده سپورت قیلیش‌لری اوچون پارک‌لر نینگ آچیلیشینی ایستهیمیز.»
بیزلرنینگ فیسبوک صحیفه‌میزگه باش اورینگ!
عیاللر گه سپورت قیلیش و دم آلیش ییرلری، سپورت قیلیش جریانیده اولر نینگ راحت‌لیگی اوچون بیر ییر دیر که، پارک‌لر نینگ یاپیلیش بویروغی کیلگنی‌دن کیین، مذکور راحت‌لیک اولردن آلیندی. شونینگدیک وزنی نی کمه‌یتیریش اوچون سپورت قیله‌دیگن کابل نینگ شهرنو منطقه‌سی یشاوچیسی شایسته نینگ ایتیشیچه، «پارک شهرنو» گه کیله‌دیگن عیال‌لردن قطاری قان باسیمی و ایاغ آغریق کسل‌لیکلری گه چلینگنلر و سپورت قیلمه‌گنلری صورت‌ده، کسل‌لیکلری نینگ آغیرلشی ممکن. «اوتگن پیتده پارک گه کیله‌ر ایدیک، حاضر ایسه پارک گه باره آلمه‌یپمیز. سرک‌لرده هم سپورت قیلیش یخشی ایمس.»
هر ایرتنگ «چمن حضوری» دیوار‌لری آرقه‌سیده سپورت قیله‌دیگن کابل شهری یشاوچی‌لریدن باشقه بیری گل بی‌بی، اسلام امیر‌لیگی دن عیاللر نینگ سرک‌لرده آزار و اذیت بولمه‌یشلری اوچون پارک‌لر گه کیریب عیاللر نینگ سپورت قیلیشی گه رخصت بیریلیشینی ایسته‌یدی.
اونگه کوره: «عیاللر هم ایرکک‌لر کبی سپورت قیلیش گه نیازلری بار. پارک گه باریش اوچون رخصت بیریلمسه قییرده سپورت قیله‌یلیک. پارک‌لردن تشقری ده سپورت قیلسک آزار و اذیت بوله‌میز. حکومت‌دن عیاللر سپورتی اوچون مناسب مکان ایجاد بولیشینی ایستهیمیز.»
شونده‌ی بیرحالده، امر بالمعروف و نهی عن‌المنکر وزیرلیگی رسمی‌لری نینگ ایتیشلریچه، عیاللر سپورتی اوچون مناسب مکان یره‌تیش خصوصیده سعی‌وحرکت قیلماقده‌لر.
امر بالمعروف و نهی عن‌المنکر وزیرلیگی سوزلاوچیسی محمد‌عاکف مهاجر نینگ سلام‌وطندار گه ایتیشیچه: «سینگیل‌لریمیز گه مناسب بیر مکان ایجاد قیلیش اوچون سعی‌وحرکت قیله‌یپمیز. هر ساحه ده بولسه هم سعی‌وحرکت قیله‌میز. عیاللر گه پارک‌لرده سپورت قیلیش اوچون رخصت بیرگن ایدیک، بیراق پارک قانون-قاعده‌سی رعایت ایتیلمسلیگی سبب، پارک‌لر ایشیگینی یاپدیک. کیله‌جک‌ده باشقه بولیم‌لر یانیده بو بولیم‌ده هم آسایشته‌لیک ایجاد بولیشی اوچون تلاش قیله‌میز.»
بیزلرنینگ توییترده هم تعقیب قیلینگ!
اسلام امیر‌لیگی ۱۴۰۰-ییل نینگ یاز موسومی‌ده قدرت گه ایریشگنیدن کیین، عیاللر اسلامی حجاب نی رعایت قیلیش بیلن پارک‌لر گه باره آله‌دیلر دیگن ایدی؛ بیراق قریب آلتی آی آلدین، امر بالمعروف و نهی عن‌المنکر وزیرلیگی، عیاللر نی پارک‌لر گه باریشینی تقیق له‌دی.
