چین رسمیلرینینگ اعلام قیلیشیچه، اوشبو مملکتده آتشبازلیک مادهلری ایشلب چیقریلهدیگن بیر کارخانهده یوز بیرگن پارتلش نتیجهسیده اولگنلر سانی، ۳۷ کیشیگه آشگن.
خلقارا ییتکرمهلرنینگ بوگون (۱۸-ثور/۸-می، جمعه)، گزارش بیریشیچه، اوشبو پارتلش دوشنبه کونی آخشم چاغی چیننینگ هونان ولایتی مرکزی، لیویانگ شهریده یوز بیرگن.
گزارشلر اساسیده، واقعه محلیده قوتقریش و اختریش عملیاتی یکونلهنیب و ۵۱ کیشی کسلخانهلرده دوالنیش آستیده قرار تاپگن.
ایتیلیشچه، بو واقعه توغریسیده تدقیقات باشلهنیب و مذکور مملکت پولیسی آرقهلی اوشبو هلاکتلی پارتلشگه تیگیشلی دیب گمان قیلینگن سکیز کیشی تیرگاو گه چقیریلگن.
بوندن آلدین چین رسمیلری، اوشبو مملکتده آتشبازلیک مادهلری ایشلب چیقریلهدیگن اوشبو کارخانهده پارتلش یوز بیرگنی نتیجهسیده، کمیده ۲۱ کیشی اولیب و ۶۱ کیشی یرهلنگنینی معلوم قیلگن ایدیلر.
شونینگدیک اوشبو واقعه یوز بیرگنیدن کیین، چین جمهور باشلیغی شی جین پینگ، کینگ کولملی تیکشیروولر عملگه آشیریلشینی سورهب و مملکت رسمیلریگه اساسی صنعتلردهگی خوف-خطرلر نظارت بولیشی و ریسکلر باشقریلیشینینگ کوچهیتیریلیش بویروغینی بیرگن ایدی.
