ساعت ۱۲:۰۰دن اوتگن و هوا جوده‌یم ایسیق دیر. بغلان مرکزی پلخمری شهری نینگ ملکی کسل‌خانه سرکی‌ده، ایش بیلن شغللنگن باله‌لر نی کوردیم، اوشبو پیتده «پیمان آیسکریم آلینگلر، پیمان!» دیب چقیره‌‌دیگن ۱۱-۱۲ یاشر بیر باله بیلن دوچ کیلدیم که اوزی نی رضوان دیب تنیتتی. او ییتی کیشی‌لیک عایله نیازلری نی تامین‌لش اوچون سرک‌لرده آیسکریم ساتیش گه مجبور بولگنی نی بیان قیلدی. رضوان نینگ ایتیشیچه: «کونده ۱۰۰-۱۵۰۰ افغانی ایشله‌یمن، درس اوقیمه‌یمن؛ چونکه عایله‌میزده قیین‌چیلیک‌لر بار.»
بیزلرنینگ توییترده هم تعقیب قیلینگ!
رضوان، تعلیم و اورگنیش گه قیزیقیشی اوچون، یریم کون اوسته‌خانه‌‌لر یا-ده باشقه ییردن بیریده ایشلب و اوندن کیین مکتب گه باریش نی ایسته‌یدی؛ بیراق او و عایله‌سی نینگ روپه‌ره بولگنی یامان وضعیت، اونینگ کیچیک و اونملی ایسته‌گی گه ییتیشه آلمه‌سلیگی گه سبب بولگن. رضوان نینگ کوپه‌یتیریشیچه، بیر کون شفاکار بولیش نی ایسته‌یدی؛ لیکن درس و مکتب‌دن اوزاق بولیش، اونینگ بو ایسته‌گی گه قول تاپه آلمه‌سلیگی نی توشونتیره‌دی. او، عایله‌سیده روپه‌ره بولگن قیین‌چیلیک‌لر گه اشاره قیلیب ایتیشیچه: «اوی‌ده بعضا نان هم بولمه‌یدی و آته‌م غضب‌لنه‌دی که نیگه اوی‌ده‌سین، باریب ایشله دیدی. کیله‌جک‌ده شفاکار یا-ده یخشی‌راق ایش قیله آلگنیم پیتده یخشی بوله‌دی. حیات بو کبی بولگنی صورت‌ده، هیچ نرسه بولمه‌یدی. بعضا زور بیلن ایشلش گه یوباره‌دیلر.»
بغلان ده عایله‌لر اقتصادی قیین‌چیلیگی، باله‌لردن کوپ قطاری نینگ وضعیتی نی رضوان وضعیتی کبی قیلگن. پلخمری شهری سرک‌لریده کراچی‌سی بیلن ایش اختریب یوریگن ۱۲ یاشر نازک‌میر نینگ ایتیشیچه، آته‌سی قریگن دیر و ایش قیله آلمه‌یدی و او آلتی کیشی‌لیک عایله سرپرستی دیر. لیکن نازک‌میز رضوان‌‌دن خوشبخت‌راق دیر؛ چونکه مکتب باره‌دی و درس‌دن کیین ایشله‌یدی. اونینگ کوپه‌یتیریشیچه: «اوی‌ده اینگ بویوک فرزند‌مین و آته‌م قریگن، ایش قیله آلمه‌یدی. کراچی هیده‌یمن. ساعت بیش ده مکتب باره‌من و ساعت توقیز‌ده بو ییر گه کیله‌من و شام نمازی‌گچه ایشله‌یمن. درس اوقیب شفاکار بولیش نی ایسته‌یمن. نیمه قیله‌یلیک اوی‌ده هیچ نرسه تاپیلمه‌یدی، پول یوق و قشاقلیک دیر.»
اقتصادی مسئله‌لر بیلرمانی نینگ ایتیشلریچه، اجتماعی عامل‌‌لر و اقتصادی قشاقلیک باله‌لر نینگ قتیق و قیین ایشلر گه یوز کیلتیریشی گه مجبور بوله‌دیگن اینگ اونملی سبب‌لر دیر.
اقتصادی مسئله‌لر بیلرمانی رفیع محمدی نینگ ایتیشیچه: «حاضر ایسه افغانستان ده باله‌لر نینگ ایشله‌ش گه مجبور قیله‌دیگن سبب، اقتصادی عامل دیر. عایله‌لردن کوپینچه‌سی ییترلیچه درآمد قولگه کیلتیره آلمه‌یدی.»
بیزلرنینگ فیسبوک صحیفه‌میزگه باش اورینگ!
بغلان ایش و اجتماعی ایشلر ریاستی مسئوللری نینگ ایتیشلریچه، اوشبو ولایت‌ده ایشچی باله‌لر اوچون، تعلیمی بیر مرکز ایجاد قیلگنلر و باله‌لر نی توپلب و اولر گه تعلیم زمینه‌سی نی یره‌تیش اوچون سعی و حرکت قیلماقده‌لر. اولر گه کوره، بیرلشگن ملت‌لر تشکیلاتی نینگ باله‌لردن حمایت قیلووچی صندیغی یا-ده یونیسف، بغلان ده ایشچی باله‌لر گه خاص تعلیمی مرکز ایجاد قیلیش اوچون، ۵۰۰ مینگ افغانی یاردم بیرگن دیر.
بغلان ایش و اجتماعی ایشلر ریاستی آماری اساسیده، مذکور ولایت‌ده ۱۴ مینگ گه یقین باله، قتیق و قیین ایشلر بیلن شغللنگن.
